Zúlfııa Súleımenova qyzmetinen bosatyldy
ASTANA. KAZINFORM – Aqorda Zúlfııa Súleımenovanyń qyzmetinen bosatylǵanyn habarlady.
- Memleket basshysynyń ókimimen Zúlfııa Bolatqyzy Súleımenova Qazaqstan Respýblıkasy Prezıdentiniń keńesshisi – Prezıdenttiń halyqaralyq ekologııalyq yntymaqtastyq jónindegi arnaýly ókili laýazymynan bosatyldy, - delingen aqparatta.
Zúlfııa Bolatqyzy 1990 jyly Aqtóbe qalasynda dúnıege kelgen.
2012 jyly L. N. Gýmılev atyndaǵy Eýrazııa ulttyq ýnıversıtetin «Halyqaralyq qatynastar» mamandyǵy boıynsha bitirgen. 2014 jyly L.N.Gýmılev atyndaǵy Eýrazııa Ulttyq ýnıversıtetinen halyqaralyq qatynastar magıstri dárejesin alǵan. 2016 jyldan bastap PhD doktorantýra baǵdarlamasy boıynsha Ulttyq saıası zertteýler ınstıtýtynda (GRIPS, Japonııa) bilim aldy.
Eńbek jolyn 2013 jyly bastaǵan.
2014-2015 jyldary – QR Prezıdenti janyndaǵy Qazaqstandyq strategııalyq zertteýler ınstıtýtynyń (QSZI) syrtqy saıasat jáne halyqaralyq qaýipsizdik bóliminde ǵylymı qyzmetker.
2015-2017 jyldary Birikken Ulttar Uıymynyń Azııa jáne Tynyq muhıt aımaǵy boıynsha ekonomıkalyq jáne áleýmettik komıssııasynda Qorshaǵan orta jáne damý dıvızıonymen, Energetıka dıvızıonymen, sondaı-aq Makroekonomıkalyq saıasat jáne damýdy qarjylandyrý dıvızıonymen (Bangkok, Taıland) tyǵyz qarym-qatynasta jumys istedi.
2019 jyly Túrkimenstandaǵy jáne Qazaqstandaǵy BUU Damý baǵdarlamasynda, sondaı-aq BUU ESKATO uıymynyń qorshaǵan orta jáne damý dıvızıonynda qyzmet atqardy.
2020-2021 jyldary – QR ekologııa, geologııa jáne tabıǵı resýrstar mınıstrligi Klımattyq saıasat jáne jasyl tehnologııalar departamenti dırektorynyń orynbasary.
2021-2022 jyldary – VII saılanǵan Qazaqstan Respýblıkasy Parlamenti Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi.
2022 jyldyń naýryz aıynan 2023 jylǵy qańtarǵa deıin – QR ekologııa, geologııa jáne tabıǵı resýrstar vıtse-mınıstri.
2023 jyldyń 4 qańtarynan 1 qyrkúıegine deıin QR Ekologııa jáne tabıǵı resýrstar mınıstri qyzmetin atqardy.
2023 jylǵy 21 qyrkúıekte Memleket basshysynyń ókimimen Qazaqstan Respýblıkasy Prezıdentiniń keńesshisi – Prezıdenttiń halyqaralyq ekologııalyq yntymaqtastyq jónindegi arnaýly ókili laýazymyna taǵaıyndaldy.
Aıta keteıik, buǵan deıin Kúnsulý Zakarııa qyzmetinen ketkeni málim boldy.