Júsipbek ustaǵan Quran kitap Buqar jyraý mýzeıinde tur
PAVLODAR. KAZINFORM - Buqar jyraý atyndaǵy ádebıet jáne óner mýzeıinde Júsipbek Aımaýytuly ustaǵan quran kitap saqtaýly tur. Jádigerdi zamanynda Baıanaýyldaǵy Ábildá haziret ózge dinı kitaptarmen birge Buqaradan kerýen tarttyryp aldyrǵan eken.
Júsipbek týǵan qasıetti meken ejelden «Áýlıeli Qyzyltaý» óńiri dep atalady. Aýmaqta ólketanýshylardy qyzyqtyryp otyrǵan tarıhı mekenniń biri – shamamen HH ǵasyrdyń basynda haziret Ábildá Isabekuly saldyryp, bala oqytqan meshit-medrese orny. Bul dinı oqý ornynda zamanynda Júsipbek, jazýshy, ataqty satırashy Qadyr Taıshyqov saýatyn ashqan. Ábildá haziret Buqaradan kerýen tarttyryp, 10 túıemen 10 márte barǵyzyp, úıip-tónip dinı kitap aldyrtqan. Sonda túıeden túsirilgen kitaptar atyrapty alyp jatady eken.
1936 jyly bolshevıkter medreseni talqandaǵanda jurt onyń ishinde qalanyp turǵan Quran kitaptardyń barlyǵyn Qadyrdyń atasy Taıshyqtyń molasyna aparyp úıgen. Taıshyq atanyń kesenesi bıikteý ári ústi aǵashpen jabylǵandyqtan, kitaptar uzaq jyldar boıy saqtalyp kelipti. Alaıda keıin tóbesi janyp ketip, kitaptar búline bastaǵan soń jergilikti azamattar bútin qalǵandaryn úılerine tasyp áketken. Júsipbek ustaǵan Quran kitaptyń birin ólketanýshy Ramazan Nurǵalıev aman saqtap qalyp, Baıanaýyldaǵy Musa myrza meshitine tapsyrypty. Álgi kitaptyń alǵashqy betine belgisiz bireý latyn álipbıimen medreseniń órtelgen ýaqytyn jazyp qaldyrǵan.
J. Aımaýytulynyń 135 jyldyǵyna oraı tarıhı jádigerdi Baıanaýyl aýdanynyń bas ımamy Saıan Qojın Buqar jyraý mýzeıine amanat etti.
Eske sala keteıik, buǵan deıin Baıanaýylda Júsipbek Aımaýytuly negizin salǵan Mádenı kindik mekeni jaıynda sıpattap jazǵan edik.
