Júrgizýshilerge arnalǵan telegram-bot iske qosyldy

ASTANA. KAZINFORM - Júrgizýshilerge qolaıly jaǵdaı jasaý maqsatynda arnaıy Telegram-bot iske qosyldy. Bul servıs jol paıdalanýshylaryna joldardaǵy jaǵdaıdy onlaın rejımde baqylaýǵa múmkindik beredi.

«QazAvtoJol» mekemesi baspasóz qyzmetiniń habarlaýynsha, qyzmetti paıdalaný úshin smartfon men telegram qosymshasy bolsa jetkilikti.

«QazAvtoJol-Bot» arqyly júrgizýshiler respýblıkalyq mańyzy bar avtomobıl joldaryndaǵy qozǵalys jaǵdaıy týraly jedel aqparat ala alady.

Joldaǵy jaǵdaıdy onlaın baqylaý úshin bar bolǵany «Kamera translıatsııasy» batyrmasyn basyp, ózińizge qajetti jol ýchaskesin tańdasańyz jetkilikti. Osydan keıin bot tańdalǵan jerdegi beınetranslıatsııany jiberip, júrgizýshilerge joldaǵy naqty jaǵdaıdy kórýge múmkindik beredi.

Botta onlaın translıatsııadan bólek birneshe qosymsha servıs te iske qosylǵan. Paıdalanýshylar operatormen baılanys, teńgerimdi tekserý, balansty tolyqtyrý, jol boıyndaǵy janarmaı quıý beketteri jáne aýa raıy týraly aqparat ala alady.

-Bul tsıfrlyq qyzmet júrgizýshilerge saparyn tıimdi josparlaýǵa, ýaqytty únemdeýge jáne joldaǵy qaýipsizdikti arttyrýǵa kómektesedi,-delingen habarlamada.

Avtosaqtandyrý qunynyń ósýine qatysty aqparatty myna jerden alasyz.