Júrekti bala izdeımiz - grek-rım kúresiniń bapkeri
AQTÓBE. KAZINFORM – Aqtóbelik bapker Erlan Myrzaǵulov bilekti, júrekti balýandardy aýylǵa baryp izdeýge den qoımaq. Sonymen birge jastardan ósip, eresekterge ótkende arnaıy akademııa bolǵandy qalaıdy. Osy aralyqta sportty emes, qarapaıym ómirdi jalǵastyratyn balýandardy yntalandyrý áli de ońaıǵa soqtaı júrgenin aıtyp berdi. Qazir ózi kishkentaıynan tárbıelegen Dinıslam Saǵıtjan álem chempıonatynyń qola júldegeri atanyp, 17 jyldan keıin úzdik nátıje kórsetti. Erlan Myrzaǵulov kúresker balýandy tárbıeleý men ondaǵy kedergilerdi Kazinform tilshisine aıtyp berdi.
Maqsat – Olımpıada chempıonyn daıyndaý
Erlan Myrzaǵulov - Shalqar aýdanynyń týmasy. Aqtóbe oblysy boıynsha osy aýdanda ǵana grek-rım kúresi oń jolǵa qoıylyp, damyp keledi. Al ózge aýdandarda mundaı úıirme joq. 2001 jyldan bastap Shalqardaǵy V.Tsehanovıch atyndaǵy mektepte jattyqtyrýshy bolǵan ol 2016 jyly Aqtóbe qalasyna qonys aýdarady. Munda Eset batyr atyndaǵy mektep-ınternat-kolledji ashylyp, bapkerlikti jalǵastyrdy. Ózi ǵana emes, jattyqtyryp júrgen balalary ere keldi. Tipti buǵan deıin Almaty, Astanaǵa aparǵan sút betindegi qaımaǵy da shaqyryldy. Olar jattyqtyrýshy sózin eki etpeı, sporttaǵy mansabyn Aqtóbede jalǵastyrdy. Bapker ár sportshynyń aıaq alysyn baǵamdap, Olımpıada chempıonyn daıyndaýdy maqsat etip otyr.
- Grek-rım kúresi - Olımpıadalyq sport túri. Ár sportshy men ár bapkerdiń maqsaty – olımpıada shyńyna jetý. Osyny anyq uqqan jastardy túrli jarystarǵa daıyndap jatyrmyz. Meniń aldymdaǵylar U20, ıaǵnı, 20 jasqa deıingi balýandar. Olar Azııa, Álem chempıonattaryna qatysyp, shyńdalyp, Olımpıadaǵa barsa deımiz,- dedi Erlan Myrzaǵulov.
Sportshylar úshin jyl basy – jaýapty kezeń. Jańa jyldyq demalystan soń olar aldymen taý basyna shyǵyp júgirip, aqpan aıynda boz kilemde ádis-tásilderdi pysyqtaıdy.
- 5-8 sáýir aıy aralyǵynda Petropavl qalasynda ótetin jastar arasyndaǵy Qazaqstan chempıonatyna qatysady. Sol jerde Azııa, Álem chempıonatyna qatysatyn jastar irikteledi. Oqý-jattyǵý Shymkent qalasynda ótedi. Barlyǵy 10 salmaq boıynsha 10 balýan barady. Ol jerge túrli elden komanda kelip, qatysady. Ázirbaıjan, Ýkraına, Belgııa komandalarymen birge jattyǵý jasaımyz. Sonymen birge Jaqsylyq Úshkempirovti eske alýǵa arnalǵan halyqaralyq týrnırge qatysyp, daıyndyq júredi. Qazir bizde 55, 60, 63, 67, 72, 77, 82, 87, 97, 130 salmaq dárejesi boıynsha eki balýannan bar. Sonyń ishinde irikteý ótkizip, daıyndyǵyn negizge alamyz. Sportshynyń psıhologııalyq ázirligi de mańyzdy. Birneshe jarysqa bir sortshynyń qatar qatysatyn kezi bolady. Keıde eki sportshynyń da alamyz. Máselen Qazaqstan birinshiligine 15 sportshy barady. Barlyǵy 10 salmaqty toltyrǵan soń, taǵy beseýin qosymsha aparýǵa múmkindik bar. Babynda degenimiz - aýyryp-syrqamaı, daıyndyqty turaqty ótkizgeni, jaqsy kúresip, ózin kórsetkeni. Bala báıgege qosýǵa daıyn bolady. Sony babynda dep aıtamyz. Keıde salqyn tıip aýyryp, jaraqat alyp qalady. Daıyndyq kezinde de bir-biriniń kúshin aıamaı, baryn salady ǵoı. Iyǵy, shyntaǵy, tizesi aýyryp ketýi múmkin. Sondaıda demalys berip, dárigerler em-dom júrgizedi,- dedi bapker.
Eset batyr atyndaǵy mektep-ınternat-kolledj – Qazaqstandaǵy eń úzdik oqý orny
Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledji 2017 jyly ashyldy. Sodan beri munda 7-synyptyń oqýshylary, sportshylary qabyldandy. Sportqa beıim balalar munda 11 synypty bitirip, keıin kolledjde oqýyn jalǵastyrady. Mundaǵy bilim ordasy tamaqtandyrý, jatyn orynmen tolyq qamtylǵan. Jas sportshylardyń toby U15, U17 jáne U20 dep bólinip, jattyǵýdy jaz aıyna deıin jalǵastyrady. Tártip pen rejımniń arqasynda az ýaqytta kóp nátıjege jetkenin aıtty jattyqtyrýshy.
- Aqtóbe oblysynda túrli balalar-jasóspirimder sport mektepteri bar. Balalardyń alǵashqy daıarlyqtary sonda ótip, irikteledi. Keıin arnaıy mektepke qabyldanady. Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledji ashylǵanǵa deıin daryndy balalardy Astana, Almatyǵa aparyp, kózderin jáýdiretip, tastap ketetin edik. Qazir Qazaqstandaǵy 17 oblys pen 3 qala ishinde Aqtóbeniń mektep-ınternat-kolledji chempıon bolyp tur. U15, U17 sportshylary komanda boıynsha aldy keledi,- dedi Erlan Myrzaǵulov.
Asa aýyr salmaqtaǵy balýandar az - bapker
Qazaqstannyń ózge óńirleri sekildi munda da asa aýyr salmaqta kúresetin balýan az. Muny bapkerler de biledi. Tipti bir-birine aýyldardy aralap, izdeýge shyǵýǵa keńes te berdi.
- Aýyr salmaqta sportshy az ekeni ras. 1-2 ǵana bolady. Sebep - usaqtalyp baramyz. Bizge janashyr aǵalarymyz «aýyldyq jerlerdi aralaıyqshy» dep usynys ta aıtqan. Qonaqta, dastarhan basynda otyrǵanda «aýylda osyndaı balalar bar, qaıratty» dep te eskertedi. Qojalyqta, shóp atyp júr olar. Qazir olardy tabý, tartý, baýlýǵa baǵyttalǵymyz keledi. Ózimiz tárbıelep jatqan balalar da ósip kele jatyr. Bolashaqta jaqsy nátıje kórseteti dep oılaımyn. Grek-rım kúresinde barlyǵy 6 bapker bar. Aýyzbirshilikpen, bir qazanda qaınap, ortaǵa salyp, ár balaǵa jospar qoıyp, jumys istep jatyrmyz,- dedi bapker.
Eresek sportshylarǵa akademııa kerek
Mektep, kolledj, ýnıversıtet bitirgen sportshy, ári qaraı otbasyn tańdap, bala-shaǵa asyraý, ata-anaǵa qamqor bolý qamyna kirisedi. Al sportshy jetistikke jetýi úshin munyń bárin ysyryp, 30-35 jasqa deıin boz kilemde beldesýin jalǵastyrýy tıis. Qazaqstandyq bapkerler qazir arnaıy akademııa ashý máselesin qozǵap júr.
- Jas sportshylar 11 bitirgen soń ketip qalady. Olardyń psıhologııasy qıyn. Ótpeli kezeń ǵoı. Qymbat telefon, ádemi kıimge qyzyǵady. Jolǵa shyqqanda keıde aǵa bolyp sóılesemiz. Sonda syr aqtarady. Óz qatary qydyryp júrgende bular tórt qabyrǵaǵa telmirip jatady. «Sender shydańdar» dep aıtamyn. Álem chempıonatyn utyp kelip jatqanda bir kezderi ketip qalǵan balalar kútip alady, kóredi de qyzyǵady. Biz «kúresti tastamaǵanda osylaı bolatyn edi» dep aıtamyz. «Jurt qyzyqty kósheden, abyroıdy ınternetten izdeıdi, sen osy jerde kórset» dep eske salyp otyramyn. Bedel jınap, maman, adam bolyp shyq dep aıtamyn. Bizde kúreske myqtysy da, bapkerlikke ıkemdisi de bolady. Olardy da baǵyttap otyramyz. Keleshekte aýdandarǵa barsa, jaqsy bapker bolady. Grek-rım kúresi minezge qaraıdy. Minez myqty bolýy kerek. Júrekti bala izdeımiz. Keıbir balalar tártipti, minezi jaqsy, tárbıeli bolady. Olar jarysqa barǵanda qobaljyp qalady,- dedi bapker.
Dinıslam Saǵıtjan - Álem chempıonatynyń qola júldegeri
Bapker Erlan Myrzaǵulovtyń aıtýynsha, 1991 jyly Esenkeldi Batyrǵarın KSRO jastar qurama sapynda bolyp, Chehoslovakııada ótken álem chempıonatynyń kúmis júldesin aldy. Al 2006 jyly Ashat Qudaıbergenov Gvatemalada ótken álem birinshiliginde kúmis júldeger atanǵan. 2023 jyly Iordanııanyń Amman qalasynda Dinıslam Saǵıtjan qola medal taqty. Onyń armany – Olımpıada chempıony bolý.
- Shalqar qalasynda júrgende ákem V.Tsehanovıch sport mektebine apardy. Ol kezde 2-synyp oqýshysy boldym. Alǵashqy bapkerim osy Erlan Myrzaǵulov. 7-synypqa jetkende Almatydaǵy «Shańyraq» sport kolledjine bardym. Úsh jyldan soń osynda keldim. Óz bapkerim 9-synypta shaqyryp, janyna aldy. 2017 jyly 15 jasqa deıingi sportshylar arasynda Qazaqstan chempıony atandym. Keıin 2020 jyly jastar arasynda kúmis júlde alyp, 2023 jyly 20 jasqa deıingi balýandar arasynda Qazaqstan chempıony boldym. Sonymen birge 23 jasqa deıingi jastar arasynda da el chempıony atandym. Byltyr tamyz aıynda Álem chempıonatynyń qola júldesin aldym, - dedi ol.
Balýan buǵan deıin 63 kelide kúresse, qazir 67 keli salmaq dárejesine ótken. Bozkilemde óziniń eki ádisin sátti oryndaı alady.
- Ár sportshynyń maqsaty – Olıpm shyńyn baǵyndyrý. Birinshi Qazaqstan, keıin Azııa, Álem chempıonattaryna shyǵyp, keıin jańa belesti baǵyndyramyz. Bizdiń bar ómirimiz jattyǵý zalynda ótedi dese de bolady. Ádette eki, jarysqa daıyndyq kezinde úsh ret jattyǵý ótkizemiz. Oqý-jattyǵýdyń kóp paıdasy bar. Óz óńirimizde júrsek, tıimdiligi az. Al ózge óńirge baryp, kóp balýan arasynda júrsek, shyńdala túsemiz. Biz bir-birimizdiń ádis-tásilimizdi bilgenmen, bozkilemde bári basqasha bolady. Onda sáttilik qana jeńis ákeledi. Eki raýndtyń 6 mınýty bizdiń taǵdyrymyzdy sheshedi. Shynyn aıtqanda biz bozkilemde qarsylas bolǵanmen, odan shyqqan soń biz dos, áriptespiz. Biraq shetelde júrsek bári basqasha. Bir salmaqta bir adam barǵan soń eliń úshin bar kúshti salasyń. Armanym – álem chempıony, Olımpıada chempıony bolý. Sportshy úshin tuǵyrǵa kóterilý eń kúshti sezim, keremet sát,- dedi Dinıslam Saǵıtjan.
