Jol sapasyn baqylaýdaǵy jańa sheshim
ASTANA. KAZINFORM — Joldar sapaly ári qaýipsiz bolýy úshin turaqty baqylaýdy talap etedi. Bul maqsatta Kólik mınıstrligi jol ınfraqurylymyn dıagnostıkalaýǵa baǵyttalǵan zamanaýı tehnologııalardy engizip keledi. Bul týraly vedomstvonyń baspasóz qyzmeti málim etti.
Búginde Jol aktıvteriniń ulttyq sapa ortalyǵy (JAUSO) janynda jańa býyndaǵy 16 jyljymaly jol zerthanasy jumys isteıdi.
Bul ınjenerlik keshenderdiń quramynda:
• datchıkter men GPS-navıgatsııasy,
• geometrııalyq parametrlerdi ólsheý júıeleri, boılyq (IRI) jáne kóldeneń tegistik ólshegishter,
• beınekameralar,
• «Dına-3» jáne «Dına-4» qondyrǵylary, jabyn tegistigin baqylaýǵa arnalǵan PKRS-2Ý tirkemesi bar.
JAUSO-nyń jyljymaly zerthanalary avtomobıl joldarynyń keshendi dıagnostıkasyn júrgizedi.
Budan bólek, 2025 jyldan bastap Qazaqstan jol ǵylymı-zertteý ınstıtýty (QazJolǴZI) jol qozǵalysy qaýipsizdigin tekserip otyrý úshin arnaıy jyljymaly zerthanany iske qosty. Ol kelesideı múmkindikterge ıe:
• jol tańba syzyqtary men jol belgileriniń, jol boıyndaǵy jaryq shamdarynyń jaǵdaıyn tekserýge;
• qozǵalys qaýipsizdigine áser etetin ilinisý koeffıtsıentin jáne boılyq eńis deńgeıin ólsheýge;
• jol-kólik oqıǵasy jıi bolatyn ýchaskelerdi anyqtap, olardy aldyn alýǵa baǵyttalǵan tıimdi sharalardy ázirleýge múmkindik beredi.
Bul derekter jol qozǵalysy qaýipsizdigin arttyrý jónindegi memlekettik strategııanyń bir bóligine aınalyp, ınfraqurylymdy jaqsartýǵa múmkindik beredi.
Kólik mınıstrligi halyqaralyq standarttarǵa saı zamanaýı jáne qaýipsiz jol jelisin qalyptastyrý úshin jol ınfraqurylymyn dıagnostıkalaý jáne monıtorıng júrgizýdiń jańa tehnologııalaryn engizýdi júıeli túrde jalǵastyrady.
Buǵan deıin habarlanǵandaı, jol sapasyn jasandy ıntellekt arqyly anyqtaýǵa bolady.