Jylqy eti men qoı etine qansha sýbsıdııa tólenedi

ASTANA. KAZINFORM – Aýyl sharýashylyǵy mınıstrligi mal basyna sýbsıdııa berý tetigin ótkizilgen ettiń ár kelisine aqsha tóleý tetigimen almastyrmaqshy. Aıdarbek Saparov bul ózgertý saladaǵy barmaq basty, kóz qysty shemalardy joıý úshin qolǵa alynyp otyrǵanyn aıtady.

- Buǵan deıin mal tuqymyn asyldandyrýǵa sýbsıdııa berilip keldi. 100 mal bolsa, ár basyna 10 myń teńgeden berdik. Biraq bul jerde qarymta mindetteme qarastyrylmaǵan. 100 sıyrdan 10 buzaý alsań da, 80 buzaý alsań da birdeı sýbsıdııa tólenedi. Bul endi memlekettiń aqshasyn dalaǵa shashý der edim. Sondyqtan budan ketý kerek. Biz ony etke aýystyryp jatyrmyz. Ár et kombınatyna nemese bordaqylaý alańyna ótkizgen mal salmaǵynyń ár kelisine sýbsıdııa beremiz. Qaı kombınatqa qansha et ótkizilgenin naqty tekserip otyrýǵa bolady. Al mal tuqymyn asyldandyrýǵa berilgen sýbsıdııany olaı tekserý múmkin emes. Sondyqtan kóp is qozǵalyp jatyr, - dedi ol.

Sondaı-aq, ol aldaǵy bir aıdyń ishinde mal ósiretin fermerlerge 5 paıyzdyq nesıe berý máselesi naqty sheshimin tabatynyn aıtty. 

- Biz olarǵa 5 paıyzdyq jeńildetilgen nesıe beremiz. Bıyl alǵash ret berilgeli otyr. Jalpy Qazaqstan boıynsha 50 mlrd teńge bólmekshimiz. Ony da áleýmettik-kásipkerlik korporatsııalar arqyly, agronesıe korporatsııasy arqyly alýǵa bolady. Bir aıdyń ishinde osyndaı sheshim qabyldanady dep oılaımyz, - dedi ol.

«Jylqy etine, sıyr etine, qus etine, qoı etine, shoshqa etine neshe teńgeden lımıt belgileısizder» dep surady jýrnalıst.

Mınıstr et sýbsıdııasy sharýashylyqtyń bul túrlerine de qarastyrylǵanyn aıtty. Biraq mólsherlemesi áli naqtylanbaǵan.

- Mysaly, sıyr etin bordaqylaý alańyna nemese et kombınatyna kılogramyn 1 100 teńgeden ótkizse, sonyń 200 teńgesin memleket tóleıdi. Qoı etine de, jylqy etine de osylaı tólenedi. Biraq ár kılogramǵa qansha bolatynyn osy bir aıdyń ishinde naqtylaımyz. Bul jerde búkil et kombınaty tekserýge alynady. Bar-joǵy 172 et kombınaty bar. Al malmen aınalysatyn sharýashylyqtardyń sany – 300 myń. Sondyqtan osy júıemen tekserý jeńil, - dedi Aıdarbek Saparov.

Sondaı-aq, búgin Energetıka mınıstrligi kóktemgi egis maýsymyna dızel baǵasyn usyndy. Sonymen qatar AShM basshysy mal sharýashylyǵyna sýbsıdııa berýdi toqtatylýy múmkin ekenin aıtqan edi.