Armenııada Eýropalyq saıası qoǵamdastyqtyń sammıti ótip jatyr
ASTANA. KAZINFORM — Armenııanyń astanasynda Eýropalyq saıası qoǵamdastyqtyń segizinshi sammıti bastaldy, dep habarlaıdy Kazinform agenttiginiń EO-daǵy menshikti tilshisi.
Іs-shara eki kúnge josparlanǵan — jeksenbi, 3 mamyr jáne dúısenbi, 4 mamyr. Oǵan Eýropanyń shamamen 48 eliniń kóshbasshylary men EO seriktesteri qatysyp jatyr. Sondaı-aq alǵash ret Kanada premer-mınıstri de qosyldy. Bul platformanyń Eýropadan tys keńeıip jatqanyn kórsetedi.
Jıynda Antonıý Koshta, Ýrsýla fon der Lıaıen, Roberta Metsola, Kır Starmer, Vladımır Zelenskıı, Mark Rıýtte jáne basqa da joǵary laýazymdy tulǵalar boı kórsetti.
Eýropalyq saıası qoǵamdastyqtyń segizinshi sammıtiniń urany — Building the Future: Unity and Stability in Europe («Bolashaqty quramyz: Eýropadaǵy birlik pen turaqtylyq»).
Erevandaǵy jıynda qurlyq kóshbasshylary demokratııalyq turaqtylyqty nyǵaıtý, energetıkalyq jáne ekonomıkalyq qaýipsizdik, gıbrıdti qaýipterge qarsy turý, baılanystar jáne aımaqtyq turaqtylyq máselelerin talqylaıdy dep josparlanǵan.
Armenııa premer-mınıstri Nıkol Pashınıan Erevanda mundaı is-sharanyń ótýi eldiń eýropalyq keńistikke ıntegratsııasy men demokratııalyq qundylyqtarǵa beıildiligin kórsetetin mańyzdy qadam ekenin atap ótti.
Eýropalyq saıası qoǵamdastyq 2022 jyly EO ınstıtýttarynan tys eýropalyq kóshbasshylar arasyndaǵy beıresmı dıalog alańy retinde qurylǵan. Sarapshylardyń pikirinshe, ol qoldanystaǵy qurylymdardy almastyrmaıdy, kerisinshe tolyqtyrady jáne ortaq syn-qaterlerdi teń deńgeıde talqylaýǵa múmkindik beredi.
Osyǵan deıin Nıkol Pashınıan Ázerbaıjanmen ilgerileýdi tarıhı kezeń dep ataǵany týraly jazdyq.
