Jyl basynan beri Balqash kóliniń deńgeıi 32 sm-ge kóterildi

ASTANA. KAZINFORM — 2025 jyldyń birinshi jartysynda Balqash kóliniń deńgeıi orta eseppen 32 sm-ge kóterildi, dep habarlaıdy Sý resýrstary jáne ırrıgatsııa mınıstrligi.

Naqtyraq aıtqanda, Baltyq júıesi boıynsha 341,55 metrden 341,87 metrge deıin. Jyl basynan búginge deıin Almaty oblysyndaǵy Qapshaǵaı sý qoımasynan Balqash kóline 8,52 mlrd tekshe metr sý jiberildi. Byltyr osy kezeńde bul kórsetkish 8 mlrd tekshe metr bolǵan. Bıyl Qapshaǵaı sý qoımasynan kólge jalpy kólemi 12 mlrd tekshe metr sý jiberý josparlanyp otyr.

Balqashtaǵy sý kólemi negizinen transshekaralyq Іle ózenine baılanysty, al onyń aǵysyn Qapshaǵaı sý qoımasy rettep otyrady. Bıyl sý qoımasy qatarynan ekinshi jyl 100% toldy. Byltyr bul nysan sońǵy 10 jylda alǵash ret 100% tolǵanyn eske sala keteıik. Qapshaǵaı sý qoımasynyń tolýy Almaty oblysyndaǵy Aqdala men Sheńgeldi sýarmaly alqaptaryn vegetatsııalyq kezeńde sýmen tolyq qamtamasyz etýge múmkindik berdi.

— Balqashty saqtaý máselesine erekshe kóńil bólinip otyr. Bıyl Frantsýz ǵylymı konsortsıýmymen birlesip uıymdastyrylǵan kól basseınin zertteý maqsatynda aýqymdy dalalyq ekspedıtsııa ótken bolatyn. Frantsýz sarapshylarymen birlesip júrgizilip jatqan jumys 2040 jylǵa deıingi boljammen Balqash kólin saqtaý boıynsha master-jospar ázirleýge baǵyttalǵan. Bul — byltyr Frantsııanyń Damý agenttigi jáne Geologııalyq jáne taý-ken zertteýleri bıýrosymen birge qol qoıǵan úshjaqty kelisim aıasyndaǵy jumys, — dedi Sý resýrstary jáne ırrıgatsııa mınıstri Nurjan Nurjigitov.

Budan buryn Memleket basshysy Qasym-Jomart Toqaev Aqordada sý sharýashylyǵy qyzmetkerlerin memlekettik nagradalarmen marapattaý rásiminde Kaspıı teńizin, Balqash kólin, basqa da sý kózderin saqtap qalý máselelerine toqtaldy.