Jyl basynan beri 79 qazaqstandyq búıregin almastyrǵan

ASTANA. KAZINFORM – Densaýlyq saqtaý mınıstriniń birinshi orynbasary Tımýr Sultanǵazıev Májilis depýtatynyń saýalyna bergen jaýabynda jyl basynan beri el aýmaǵynda 141 aǵza almastyrý otasy jasalǵanyn málim etti.

Aıta ketý kerek, depýtattyq saýal búırekti aýyr syrqatyna qarsy em sharalarynyń tıimdiligin júıeli strategııalyq qadamdarmen jetildirý, búırek jetkiliksizdigine ákeletin faktorlardyń aldyn alý máseleleri qamtylǵan.

- Jyl basynan beri 141 aǵza transplantatsııasy júrgizildi, onyń ishinde 79 – búırek. Maýsym aıyndaǵy jaǵdaı boıynsha qaıtys bolǵan donordan 24 transplantatsııa jasaldy, onyń ishinde 11 – búırek, - dep jazady birinshi vıtse-mınıstr.

Onyń málimeti boıynsha, byltyr «búırek fýnktsııasynyń jetkiliksizdigi» N17-19 dıagnozynyń 5619 jaǵdaıy jańadan tirkelgen.

- Zańnama arqyly retteý úshin 2025 jylǵy 1 qańtardan bastap 21 jasqa deıingi azamattarǵa energetıkalyq sýsyndardy satýǵa tyıym salyndy. Sondaı-aq saý adamdardyń aǵzasynda qant dıabetiniń damýyn boldyrmaý úshin quramynda qant bar sýsyndarǵa salyq salý máselesi pysyqtalyp jatyr, - dep jazady Tımýr Sultanǵazıev.

Eske salsaq, sáýir aıynda elimizde alǵash ret úshtik aıqas búırek transplantatsııasy jasalǵan edi.