Jetisýda jol apattary kóbeıdi

TALDYQORǴAN. KAZINFORM- Oblysta jol-kólik oqıǵalarynyń sany ótken jylmen salystyrǵanda edáýir artqan. Bıylǵy jyldyń basynan beri óńirde 86 jol apaty tirkelip, sonyń saldarynan 25 adam qaza taýyp, 153 azamat túrli dene jaraqatyn alǵan.

Bul týraly Óńirlik kommýnıkatsııalar qyzmetiniń aqparattyq alańynda ótken baspasóz máslıhatynda aıtyldy.

Oblystyq Polıtsııa departamentiniń málimetinshe, bul kórsetkish ótken jyldyń sáıkes kezeńimen salystyrǵanda 43 paıyzǵa joǵary. Apattardyń negizgi bóligi respýblıkalyq mańyzy bar «Almaty – Óskemen» jáne «Almaty – Horgos» avtojoldarynda bolǵan. Atalǵan ýchaskeler qazirgi tańda asa qaýipti aımaqtar retinde belgilendi.

Jol qaýipsizdigin arttyrý jáne jol erejesiniń buzylýyn baqylaý maqsatynda oblys aýmaǵynda drondarmen áýeden patrýldeý jumystary júrgizilip jatyr. Bıylǵy alty aı ishinde ushqyshsyz ushaqtar arqyly 59 óreskel quqyq buzýshylyq, sonyń ishinde qarsy jolaqqa shyǵý derekteri anyqtalǵan.

Sonymen qatar apattardyń jıileýine áser etetin taǵy bir faktor – mas kúıinde kólik júrgizý. Jyl basynan beri oblys joldarynda spırttik ishimdik ishken kúıde kólik basqarǵan 114 júrgizýshi ustalǵan.

- Joldaǵy tártipti saqtaý – tek júrgizýshilerge emes, baqylaýshy organdarǵa da úlken jaýapkershilik júkteıdi. Qazirdiń ózinde drondardyń tıimdiligi dáleldenip otyr. Olar qaýipti ýchaskelerdegi ahýaldy qadaǵalap, zańbuzýshylyqtardy naqty tirkep keledi, – dedi Jetisý oblysy Polıtsııa departamentiniń ókili baspasóz máslıhatynda.

Jol qozǵalysy qaýipsizdigin qamtamasyz etý úshin óńirde birneshe shara qabyldandy:

• 9 qyzmettik avtokólikke «Ekin-Patrol» avtomatty tirkeý júıesi ornatylyp, jyldamdyqty ólsheý jáne baqylaý jumystary kúsheıtildi;

• Oblys aýmaǵynda jol-patrýldik polıtsııanyń qosymsha narıadtary kúndelikti qyzmet atqarýda;

• Bıylǵy alty aı ishinde «Qaýipsiz jol», «Mas júrgizýshi», «Abaılańyz, balalar» syndy 6 profılaktıkalyq is-shara uıymdastyrylyp, túsindirý jumystary júrgizildi.

Reıdtik tekserýler men aldyn alý jumystary demalys kúnderi de jalǵasady. Jol qozǵalysy erejelerin óreskel buzǵan júrgizýshilerge qatysty zań aıasynda tıisti sharalar qoldanylyp jatyr.

Aıta keteıik, Jetisý oblysynda jol apatynan mert bolǵandar sany 33%-ǵa kóbeıgenin jazǵanbyz.