Tramp Eýropadan ákelinetin kólikterge salyqty kóteredi
ASTANA. KAZINFORM — Donald Tramp AQSh-qa ákelinetin Eýropa kólikterine ımporttyq baj salyǵyn 25%-ǵa deıin kóterý nıetin bildirdi. Bul qadam Eýropalyq Odaqpen saýda qatynastarynyń shıelenisýine ákelýi múmkin.
Tramp Eýropalyq Odaqtan ákelinetin jeńil jáne júk kólikterine baj salyǵyn 25%-ǵa deıin kóterý josparyn jarııalady. Bul týraly ol TruthSocial áleýmettik jelisinde habarlady.
Amerıkalyq kóshbasshynyń aıtýynsha, bul sheshim EO-nyń «kelisilgen saýda kelisimin tolyq oryndamaýymen» baılanysty. Tarıfterdi kóterý kelesi aptada kúshine enedi dep josparlanǵan.
Buǵan deıin Donald Tramp pen Eýrokomıssııa tóraǵasy Ýrsýla fon der Lıaıen kóptegen taýarǵa shamamen 15% tarıfterdi qamtıtyn saýda sharttary týraly kelisti. Keıinirek AQSh Joǵarǵy soty ekonomıkalyq tótenshe jaǵdaı jarııalaýǵa negiz tappaı, prezıdenttiń úlken tarıfter engizý múmkindigin shektedi.
Nátıjesinde tarıftiń shegi 10%-ǵa deıin tómendetildi, sodan keıin AQSh ákimshiligi ony qaıta qaraýdyń balamaly quqyqtyq tetikterin izdeı bastady.
Qazirgi ýaqytta AQSh óziniń saýda balansyn jáne ulttyq qaýipsizdiktiń yqtımal táýekelderin taldap jatyr, bul jańa tarıftik saıasatty engizýge jáne EO-men qoldanystaǵy kelisimderge qaýip tóndirýi múmkin.
Tramp sonymen birge AQSh-ta shyǵarylǵan kólikterge tarıfter qoldanylmaıtynyn atap ótti. Ol elde jańa avtozaýyttar belsendi túrde salynyp jatqanyn, bul amerıkandyqtar úshin jumys oryndaryn ashatynyn jáne jaqyn arada jumysyn bastaıtynyn málimdedi.
Buǵan deıin AQSh ımportqa jańa baj salyǵyn engizetini týraly jazǵan bolatynbyz.
