Jetisý taýlarynda báısheshek gúldedi
TALDYQORǴAN. KAZINFORM — Tekeli qalasyna jaqyn, Ekpindi aýyly mańyndaǵy taýly aımaqta kóktemniń alǵashqy habarshylary — báısheshekter gúldeı bastady. Tabıǵattyń názik kórkin beınelegen sýretterdi áleýmettik jelide trevel-bloger Tólegen Ernarov jarııalady.
Taýda áli de salqyn yzǵar sezilgenimen, appaq gúlder toń jamylǵan topyraqty jaryp shyǵyp, tabıǵat súıer qaýymnyń nazaryn aýdaryp otyr. Degenmen mamandar bul gúlderdi julýǵa qatań tyıym salynatynyn eskertedi.
— Báısheshek Qazaqstan Respýblıkasynyń Qyzyl kitabyna engizilgen, ıaǵnı bul ósimdik memleket qorǵaýynda, — dedi Jetisý oblystyq orman sharýashylyǵy jáne janýarlar dúnıesi aýmaqtyq ınspektsııasy bóliminiń basshysy Nurbolat Noǵaıbekov.
Báısheshek — erte kóktemde gúldeıtin qurtqashashtar tuqymdasyna jatatyn kópjyldyq tamyr túınekti ósimdik. Ol nebári eki-úsh apta shamasynda ǵana gúldeıdi.
— Báısheshekti julýǵa, qazyp alýǵa jáne satýǵa tyıym salynǵan. Sırek kezdesetin ári joıylyp ketý qaýpi bar ósimdiktermen zańsyz áreket jasaǵandarǵa Qazaqstan Respýblıkasynyń Qylmystyq kodeksiniń 339-babyna sáıkes qylmystyq jaýapkershilik qarastyrylǵan, — dep atap ótti Jetisý oblysy Polıtsııa departamentiniń resmı ókili Janar Qalyqova.
Atalǵan baptyń sanktsııasyna sáıkes, quqyq buzǵandarǵa 3 000 aılyq eseptik kórsetkishke deıin aıyppul salý, sol mólsherde túzeý jumystaryna tartý, 800 saǵatqa deıin qoǵamdyq jumysqa jegý, úsh jylǵa deıin bas bostandyǵyn shekteý nemese sol merzimge bas bostandyǵynan aıyrý jáne múlkin tárkileý jazasy kózdelgen.
Eske salaıyq, Almatynyń bas botanıkalyq baǵynda galantýs gúliniń gúldegenin jazǵan edik