Jetisý oblysynda aqsha bopsalaýmen aınalysqan qylmystyq top ustaldy

TALDYQORǴAN. KAZINFORM – Jetisý oblysynda polıtsııa aqsha bopsalaýmen aınalysqan qylmystyq toptyń áreketin áshkereledi, dep habarlaıdy Polisia.kz.

Oblystyq polıtsııa departamentiniń Uıymdasqan qylmysqa qarsy kúres basqarmasy Taldyqorǵanda er adamdardan aqsha bopsalaǵan qylmystyq topty ustady. Top quramynda qyzdar men olardyń sybaılastary bolyp, aldyn ala oılastyrylǵan ári tsınıkalyq syzba boıynsha áreket etken.

Tergeý dereginshe, 2024 jylǵy mamyrda birneshe qyz áleýmettik jeli arqyly er adamdarmen tanysyp, áńgimelesýdi ıntımdik jaqyndyqqa jetkizgen. Keıin sybaılasy jábirlenýshige qońyraý shalyp, «qurbysy jylap otyr» degen syltaýmen shaqyrǵan. Kezdesýde er adamdarǵa zorlaý týraly aryz jazamyz dep qorqytyp, aqsha talap etken.

Osy tásilmen alǵashqy jábirlenýshiden 350 myń teńge, ekinshisinen «júktilik» syltaýymen 900 myń teńgeden astam aqsha alǵan. Keıin er adam qosylyp, úshinshi jábirlenýshiden 2 mln teńge bopsalaýǵa kómektesken, biraq olar 800 myń teńge alǵan. Taǵy bir jaǵdaıda 795 myń teńge ıemdengen.

Eń tsınıkalyq epızodtardyń biri – «kámeletke tolmaǵandy zorlaýǵa oqtalý» aıyby boldy. Bul jaǵdaıda tórt kúdikti áreket etken: bir qyz ıntımdik qatynasqa túsýi kerek bolsa, úsheýi ózderin týysy retinde tanystyryp, 800 myń teńge talap etken.

Sonymen qatar, kúdiktiler taǵy birneshe jábirlenýshiden 600 myń, 1,5 mln jáne 1 mln teńge bopsalaǵan. Bir jaǵdaıda ózderin polıtsııa qyzmetkerimiz dep tanystyryp, kúsh qoldanyp, 500 myń teńgeni tartyp alǵan.

Barlyǵy toǵyz kúdiktiniń 11 er adamnan aqsha bopsalaǵany anyqtaldy. Olardyń barlyǵy ustalyp, qamaýǵa alyndy.

Polıtsııa ınternet arqyly tanysqanda saq bolýǵa jáne bopsalaý jaǵdaıynda dereý quqyq qorǵaý organdaryna júginýge shaqyrady.

Aıta keteıik, stýdentterden aqsha bopsalady degen kúdikpen 22 jastaǵy azamat ustaldy.