Ulttyq joba kómir generatsııasynyń otyn-logıstıkalyq turaqtylyǵyn qamtamasyz etedi
ASTANA. KAZINFORM — Kómir generatsııasyn damytý jónindegi ulttyq joba aıasynda kómir generatsııasynyń uzaq merzimdi jáne teńgerimdi otyn-logıstıkalyq bazasyn qalyptastyrýǵa baǵyttalǵan keshendi sharalar kózdelgen, dep habarlaıdy Energetıka mınıstrliginiń baspasóz qyzmeti.
Kómir elektr stantsııalarynyń senimdi jumysy kómir óndirýdi, kólik ınfraqurylymyn jáne energetıkalyq qýattardy úılestire damytýǵa negizdelgen turaqty otynmen jabdyqtaý júıesin talap etedi. Jańa stantsııalardy iske qosý jáne elektr energııasyn tutynýdyń ósýi jaǵdaıynda kómirmen qamtamasyz etýdiń boljamdy modelin qalyptastyrý erekshe mańyzǵa ıe.
Negizgi baǵyttardyń biri kómir boıynsha uzaq merzimdi otyn-energetıkalyq teńgerimdi ázirleý bolady. Bul jumys qoldanystaǵy jáne jańa generatsııalaýshy obektiler úshin kómir óndirý, tasymaldaý jáne tutyný kólemderin boljaýǵa múmkindik beredi.
Sondaı-aq ishki tutynýshylar úshin magıstraldyq temirjol jelisi arqyly kómir tasymaldaýǵa turaqty tarıftik sharttar qalyptastyrý qarastyrylǵan. Bul baǵa aýytqýlarynyń táýekelderin tómendetip, elektr energııasynyń ózindik qunyndaǵy kólik quramdasynyń boljamdylyǵyn qamtamasyz etedi.
— Qosymsha túrde energııa óndirýshi uıymdar deńgeıinde otynmen qamtamasyz etý ınfraqurylymyn damytý josparlanǵan. Onyń ishinde kómir berý júıelerin jańǵyrtý jáne normatıvtik qorlardy saqtaý úshin qoıma qýattaryn keńeıtý kózdelgen. Atalǵan sharalardy iske asyrý kómir elektr stantsııalaryn senimdi otynmen qamtamasyz etip, elektr energetıkasy júıesiniń turaqtylyǵyn arttyrýǵa, sondaı-aq kómir óndirý salasy, kólik ınfraqurylymy jáne energetıka damýyn úılestirýge múmkindik beredi, — delingen habarlamada.
Osyǵan deıin Qazaqstan Air Products kompanııasyna munaı-gaz hımııasy jáne kómir hımııasyn damytýdy usynǵanyn jazǵanbyz.
