Jetisý tórinde «Myń bala» jobasy bastaldy
Qazaq tiline, qazaq halqynyń qoǵamdyq-mádenı ortasyna boı úıretýge baǵyttalǵan ıgi bastama ózge ult ókilderiniń balalaryn bir shańyraq astyna jınady.
"Myń bala jobasy aıasynda Qazaqstan boıynsha kóptegen dostar taptym. Qazirgi tańda sol dostarmen qarym-qatynastamyn. Jáne de qazaq tiliniń qandaı deńgeıge kóterilip jatqanyn, qandaı deńgeıde damyp jatqanyn baıqadym" deıdi 2016 jylǵy baıqaý jeńimpazy Irsen Kım.
Joba memlekettik tildi meńgergen oqýshylar men mektepke deıingi mekeme tárbıelenýshiler qataryn kóbeıtti.
"Shartty túrde myń bala dep atalǵanymen oǵan qamtylyp jatqan balalar sany áldeqaıda kóp. Tek ótken jyldyń ózinde ǵana bizdegi derekter boıynsha myńnan astam bala ár etnos ókilderi qazaq tilin oqyp úırendi" deıdi Qazaqstan halqy Assambleıasynyń oblystyq fılıaly tóraǵasynyń orynbasary Ǵabıt Tursynbaı.
Halyqaralyq ana tili kúni aıasynda oqýshylar saraıynda «Máńgilik el» ortalyǵynyń tusaýy kesildi. Bul jerde qazaq eliniń arǵy-bergi tarıhy, mádenıeti men salt-dástúri dáriptelip, jastardy biregeılik pen birtutastyqqa tárbıeleıdi.
