QPL: «Kaspıı» birinshiliktegi alǵashqy jeńisine jetti
ASTANA. KAZINFORM — Elordalyq «Astana» fýtboldan Qazaqstan Premer-lıgasy VIІІ týrynda aqtaýlyq «Kaspııge» ese jiberdi.
Bıyl Premer-lıgaǵa qaıta qosylǵan aqtaýlyq klýb qazirge deıin birde-bir márte jeńiske jetken joq edi. Esesine komanda quramynan kóptegen tájirıeli fýtbolshysy ketip qalǵan astanalyq komanda jankúıer kóńilinen shyǵa almaı keledi.
Kezdesý barysynda eki komanda jeńiske umtyldy. Oıynnyń 84-mınýtynda «Astana» sapynan Ivan Bashıch penaltıden múlt ketse, 96-mınýtta olardyń qatarynan Sanjar Ánýarov óziniń qaqpasyna gol soǵyp aldy.
Osylaısha «Kaspıı» qarsylasynan 1:0 esebimen basym túsip, birinshiliktegi alǵashqy jeńisine jetti.
Aıta ketsek, budan buryn búgin astanalyq «Jeńis» Qostanaıdyń «Tobylyn», «Atyraý» Óskemenniń «Altaıyn», jezqazǵandyq «Ulytaý» (Jezqazǵan) Semeıdiń «Elimaıyn» 1:0 esebimen jeńdi.
Dál qazir birinshi kezeńnen keıin Shymkenttiń «Ordabasy» klýby «Aqtóbeden» 1:0 esebimen basym túsip jatyr.
Aıta ketsek, 2 mamyrda ótken oıyndarda óz alańynda Pavlodardyń «Ertisi» almatylyq «Qaıratqa», petropavldyq «Qyzyljar» Kókshetaýdyń «Oqjetpesine» 0:1 esebimen jeńilse, «Qaısar» (Qyzylorda) — «Jetisý» (Taldyqorǵan) 1:1 esebine qanaǵat bildirdi.
