«Jershildiktiń belgileri baıqalady»: Erlan Qarın eskertkishter máselesin kóterdi
ASTANA. KAZINFORM — Erlan Qarın Qazaqstandaǵy eskertkishterdiń mazmundyq jáne maǵynalyq sapasyn arttyrý boıynsha júıeli jumys bastalatynyn málimdedi. Onyń aıtýynsha, eskertkishter ulttyq biregeılik pen ortaq qundylyqtardy dáripteýi kerek.
— Aldaǵy ýaqytta tarıhı jadty saqtaý máselelerimen júıeli túrde aınalysatyn bolamyz. Osyǵan deıin eskertkishterdi ornatýdy rettep, tártipke keltirdik. Endi olardyń maǵynalyq, mazmundyq sapasyna qatysty jumysty bastaımyz. Óıtkeni, barlyǵyna ortaq bir ustanym kerek. Óńirlerde ashylǵan eskertkishterden jershildik pen qoǵamdaǵy taǵy da basqa bir keselderdiń belgileri baıqalady. Shyn máninde, qandaı da bir eskertkish, músin nemese shaǵyn sáýlet formasy bolsyn belgili bir deńgeıde ulttyq biregeılikti damytýǵa, ortaq qoǵamdyq qundylyqtardy ornyqtyrýǵa qyzmet etýi kerek, — dedi ol.
Vıtse-Prezıdenttiń pikirinshe, sol sebepti qalyptasqan osy bir kemshilikterdi túzetýmen júıeli ári turaqty negizde aınalysýdy kózdep otyr.
— Bul rette, elimizdiń birqatar tanymal músinshilerimen kezdesip, óz oı-pikirlerimmen bólistim. Olarmen birneshe jańa baǵytta jumys júrgizýge kelistik, — dedi Qarın.
Buǵan deıin Erlan Qarın kópshilik aldynda adamdardy alalaý, óz pikirin qasaqana tyqpalaý ádeptilikke jatpaıtynyn aıtqan bolatyn.
