Jerorta teńizi normadan tys jylydy

ASTANA.KAZINFORM — Bıylǵy maýsymda Jerorta teńiziniń keıbir aýdandarynda sý temperatýrasy maýsymdyq normadan bes gradýstan astam joǵary boldy, dep habarlaıdy DW. 

1 shildede eń joǵary temperatýra 29,85°S tirkeldi, teńiz ásirese Balear araldaryna jaqyn jerde, Ispanııanyń Jerorta teńizi jaǵalaýynda jáne Frantsııanyń ońtústiginde qatty qyzdy. Mundaı kórsetkish ádette jazdyń basynda emes, maýsymnyń naǵyz qyzǵan kezinde tirkeletin, dep habarlaıdy DW Der Spiegel basylymyna silteme jasap.

Ǵalymdar rekordtyq kórsetkishterdiń — 2022 jáne 2023 jyldary jańartylǵanyna jáne jylynýdyń «uzaqqa» sozylǵanyna alańdaýshylyq bildirdi.

Aıtýlarynsha, bul búkil aımaqqa keri áser etýi múmkin. Osylaısha, ádetten tys jylyný teńiz ekojúıesi úshin qaýipti: keıbir túrler joıylady, basqalarynyń tirshiligine qaýip tónedi, marjandardyń, teńiz jándikteriniń jappaı qyrylýyna ákelýi múmkin. Balyqtardyń qonys aýdarýyna nemese popýlıatsııasynyń joıylyp ketýine baılanysty balyq aýlaý salasy aqsap qalady.

Kopernık jınaǵan jáne Meteo-Frantsııa taldaǵan málimetterge sáıkes, Jerorta teńiziniń betki temperatýrasy 29 maýsymda 26,01°C-qa jetken. Sondaı-aq, qazir temperatýra ortashadan 3°C joǵary, Frantsııa men Ispanııa jaǵalaýyndaǵy keıbir aýdandarda artyq kórsetkish 4°C-qa jetedi.

Jerorta teńizi álem boıynsha «klımat ózgerisiniń ystyq núkteleriniń» biri sanalady.

Buǵan deıin Qazaqstan men Frantsııa Úkimeti arasyndaǵy jahandyq jylynýǵa qatysty kelisim ratıfıkatsııalanǵanyn jazǵan edik.