Jeńiske úles qosqan qalalarǵa «Eńbek dańqy qalasy» ataǵy beriledi

ASTANA. KAZINFORM — TMD elderinde ekinshi dúnıejúzilik soǵysqa erekshe úles qosqan qalalarǵa arnaıy ataq beriledi. Bul týraly «Ardagerler uıymy» ortalyq keńesiniń tóraǵasy Baqtyqoja Іzmuhambetov málim etti. 

— TMD elderi basshylary keńesinde 1941-1945 jyldary ekinshi dúnıejúzilik soǵysta áskerı jáne azamattyq ónimdermen úzdiksiz qamtamasyz etip, Jeńiske úles qosqan qalalarǵa «Eńbek dańqy qalasy» ataǵyn berý jónindegi kelisimge qol qoıyldy. Bul ataqtyń qaı qalalarǵa beriletinin ár el óz betinshe sheshedi, — dedi Baqtyqoja Іzmuhambetov elordada ótken ardagerlerdiń respýblıkalyq keńesinde.

Onyń aıtýynsha, «Eńbek dańqy qalasy» ataǵyn berýdi arnaıy komıssııa qaraıdy.

— Biz komıssııa quramyna ardagerler keńesiniń múshesi, memleket jáne qoǵam qaıratkeri, general-leıtenant Abaı Tasbolatovty usyndyq. Soǵys jyldarynda Qazaqstan shıkizat pen azyq-túlik bazasyna aınalǵany, qorǵanys ónerkásibin, onyń ishinde kómir, tústi metall ónimderimen qamtamasyz etkeni barshaǵa málim. Maıdan dalasynda atylǵan 10 oqtyń 9-y Qazaqstanda quıyldy, — deıdi ol.

Osylaısha respýblıkalyq ardagerler uıymynyń tóraǵasy elimizde birneshe qalanyń atalǵan dańqqa laıyq ekenin aıtyp otyr.

Búgin elordada «Ardagerler uıymy» respýblıkalyq qoǵamdyq birlestigi ortalyq keńesiniń III plenýmy ótti. 

Buǵan deıin habarlaǵanymyzdaı, bıyl Jeńistiń 80 jyldyǵyna oraı soǵys ardagerlerine 5 mln teńge kóleminde birjolǵy tólem beriledi. Búginde bes óńirde soǵys ardagerlerine tólem jasaldy. 

Aıta keteıik, bıyl 1 sáýirdegi jaǵdaı boıynsha elimizde ekinshi dúnıejúzilik soǵysynyń 111 ardageri bar. 

Bıyl Jeńistiń 80 jyldyǵyna oraı el aýmaǵynda eki myńdaı is-shara ótedi. 

Sondaı-aq Jeńistiń 80 jyldyǵyna oraı elordada ótetin áskerı sherý barlyq respýblıkalyq telearna men LED ekrandardan tikeleı kórsetiledi.