Jasandy ıntellekt salasy boıynsha alǵashqy «Bolashaq» stıpendııalary berildi
ASTANA. KAZINFORM — Jasandy ıntellekt mamandaryna sheteldik taǵylymdamadan ótýge arnalǵan alǵashqy «Bolashaq» stıpendııalary berildi. Bul týraly Aqordanyń baspasóz qyzmeti habarlady.
Memlekettik keńesshi Erlan Qarınniń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti.
Konkýrs qorytyndysy boıynsha Respýblıkalyq komıssııa elimizdiń 184 azamatyna «Bolashaq» halyqaralyq stıpendııasyn taǵaıyndaý týraly sheshim qabyldady. Orta eseppen bir orynǵa shamamen 6 úmitkerden keldi.
Jańa stıpendııa ıegerleriniń 137-si – magıstratýrada, 10-y doktorantýrada oqıdy. Al 37 otandasymyz sheteldik ýnıversıtetter men ortalyqtarda kásibı taǵylymdamadan ótedi.
Ótken jyldyń sońynda Respýblıkalyq komıssııanyń sheshimimen jasandy ıntellekt salasyndaǵy kásibı taǵylymdamalarǵa arnalǵan jeke sanat bekitilgenin atap ótken jón. Komıssııanyń bul jolǵy otyrysynda atalǵan sanat boıynsha alǵashqy stıpendııalar taǵaıyndaldy.
Budan bólek, 51 jerlesimiz álemniń jetekshi ǵylymı jáne zertteý ortalyqtarynda ǵylymı taǵylymdamadan ótýge grant aldy.
Daryndy shyǵarmashyl jastardy qoldaý maqsatynda Respýblıkalyq komıssııa «Bolashaq» baǵdarlamasy aıasynda bakalavrıatta bilim alýǵa múmkindik beretin sanattardyń tizimin tolyqtyrdy. Atap aıtqanda, jalpy bilim beretin pánder boıynsha halyqaralyq olımpıadalardyń, halyqaralyq ǵylymı jobalar konkýrstarynyń jeńimpazdarymen jáne júldegerlerimen qatar, endi halyqaralyq shyǵarmashylyq baıqaýlardyń júldegerleri de «Bolashaq» stıpendııasyna úmitker bola alady.
Memlekettik keńesshi Erlan Qarın «Bolashaq» halyqaralyq stıpendııasyn odan ári iske asyrý jáne jetildirý jóninde naqty tapsyrma berdi.
Aıta ketelik bolashaqta qandaı mamandarǵa suranys artatyny týraly jazǵan edik.
