Jasandy ıntellekt bedeýlikpen kúresýge kómektesedi
ALMATY. KAZINFORM — Qazaqstannyń reprodýktıvti medıtsınasy jasandy ıntellekt arqyly bedeýlikti emdeýdiń eń zamanaýı ádisterin qoldanyp jatyr.
Klınıkalyq embrıolog Damıra Músuralıevanyń aıtýynsha, qazir reprodýktıvti medıtsınada zamanaýı tehnologııalar, onyń ishinde jasandy ıntellekt belsendi qoldanylyp jatyr. Bul qazaqstandyq dárigerlerdiń jumysyn aıtarlyqtaı jeńildetedi.
Osy joǵary tehnologııalyq qurylǵylardyń biri — jasandy ıntellektke ıe Embryoscope Plus ınkýbatory.
— Bul ınkýbator biregeı. ıAǵnı, onyń ishinde jasandy ıntellekt ornatylǵan jáne kameramen jabdyqtalǵan. Ol uryqty ár 15 mınýt saıyn sýretke túsirip, dárigerge ár ózgeris týraly aqparat berip turady. Uryqtyń damý qabiletin buǵan deıin embrıolog maman anyqtap kelse, endi jasandy ıntellekt tańdaıdy, — deıdi dáriger.
Sondaı-aq Qazaqstan halqynyń reprodýktıvti densaýlyǵyn jaqsartýǵa baǵyttalǵan prezıdenttik baǵdarlamanyń qurmetine Almatyda «Ańsaǵan sábı» músini ornatyldy.
— Meniń armanym — bedeýlikti túbegeıli joıý. Ár otbasyda náresteniń ińgálaǵan úni estilse eken deımin. Bedeýlikpen kúresip júrgen juptar úshin eń mańyzdysy — empatııa. Sol sebepti «Ańsaǵan sábı» músini bala súıýdi armandaıtyn ár otbasyǵa úmit beretin belgi bolmaq. Qazir Qazaqstandaǵy ár altynshy otbasy bedeýlik máselesine tap bolyp jatyr, resmı derekter boıynsha 21 myńnan astam adamǵa bedeýlik dıagnozy qoıylǵan. Sondyqtan bizdiń maqsatymyz ózgermeıdi — reprodýktıvtik medıtsınany qoldaýdyń jáne ǵylym men ınnovatsııany damytýdyń mańyzdylyǵyna qoǵam nazaryn aýdartý, — dedi «Ekomed» klınıkalar tobynyń negizin qalaýshy ári ǵylymı jetekshisi Saltanat Baıqoshqarova.
Osyǵan deıin Prezıdent 2021 jyly bastamashylyq etken «Ańsaǵan sábı» baǵdarlamasynyń nátıjesinde elde tórt jylda 10000-nan astam sábı dúnıege kelgeni týraly jazǵanbyz.
Eske salaıyq, buǵan deıin «Ańsaǵan sábı» baǵdarlamasy 2030 jylǵa deıin jalǵasatyny týraly jazǵan bolatynbyz.