Jas dombyra sheberleri baq synady
ASTANA. KAZINFORM — Búgin Qosshy qalasynda jas dombyra jasaý sheberleri baq synady. Qosshy qalasy ákimdigi men Saz aspaptar sheberleri odaǵy respýblıkalyq qoǵamdyq birlestigi uıymdastyrǵan saıysqa elimizdiń túpkir-túpkirinen 18–35 jas aralyǵyndaǵy sheberler qatysty.
– Bul baıqaýǵa elimizdiń barlyq aımaǵynan 38 adam qatysyp jatyr. Ásirese Almaty qalasynyń sheberleri óte belsendi. Almaty, Aqmola, Qyzylorda, Batys Qazaqstan oblystary men Astana, Shymkent qalalaryndaǵy sheberler jınaldy, – deıdi Saz aspaptar sheberleri odaǵy RQB tóraǵasy Erkebulan Qaınazarov.
Jarystyń taǵy bir ereksheligi – sheberler dombyrany tek el tóńireginde ósetin aǵashtardan jasaǵan.
– Baıqaýda dombyrany 2 krıterıı boıynsha baǵalap jatyr. Birinshisi – dybysy men tembri jáne dızaıny. Negizgi basymdyq qazaqy qońyr únge beriledi. Konkýrstyń negizgi talaptarynyń biri – dombyranyń materıaly jergilikti aǵash bolýy kerek. Sebebi kádimgi ózimizdiń qazaqtyń keń dalasynyń kez kelgen túpkirinde ósetin aǵashtan dombyra jasap, sony aınalymǵa engizý kerek. Onyń dybysyn tyńdaǵan kezde kádimgi ózimizdiń qońyr únge qaıtyp kelgendeı bolyp jatyrmyz, – deıdi odaq tóraǵasy.
Basty sebep syrttan keletin aǵashtar qazaqy dombyranyń qońyr únin jetkize almaıtynynda eken.
– Kóbine jańǵaq, buıra jańǵaq aǵashtarynan jasalǵan dombyralar keldi. Jıde, úıeńki de kezdesti. Jemis aǵashtaryna órik, alma, almurt aǵashtary bar. Qaıyń aǵashtarymen jasalǵan dombyralar kelip jatyr. Sondaı-aq qara aǵashtyń tamyry da kezdesti. Ádette shetelden kelgen aǵashtan jasalatyn dombyralar temir dybys beredi. Biz olardy aınalymnan shyǵarǵymyz kelip jatyr. Ol aǵashtar akýstıkalyq jaǵynan múlde basqasha bolyp ketedi. Óıtkeni olar gıtara jasaıtyn tyǵyz ári óte qatty aǵashtar. Olar bizdiń qońyr únimizdi ózgertip jiberedi, – deıdi Erkebulan Qaınazarov.
Al qazylar alqasy jas sheberlerdiń jumysyn joǵary baǵalap otyr.
– Jas sheberler arasyndaǵy baıqaý Qazaqstanda alǵash ret uıymdastyrylyp jatyr. Aldaǵy ýaqytta jyl saıyn dástúrli túrde ótedi dep otyrmyz. Baıqaýdyń negizgi maqsaty – jastardy osy salaǵa tartý. Basty másele – oryn alý emes, tájirıbe almasý. Ata kásippen aınalysyp, sheberlikterin kórsetip júrgen jaqsy jastar bar eken, – deıdi qazylar alqasynyń tóraǵasy Sultan Jaqsylyquly.
Baıqaý qatysýshylarynyń eń jasy – 20-da. Erman Dáýlet saıysta baq synaý úshin Shymkent qalasynan arnaıy at arytyp kelipti.
– Dombyra jasaýmen bala kezden aınalysamyn. Ákem de dombyra jasaý sheberi. Bala kezde maıda jumystardan bastap úırendim. Keıin iri jumystarǵa ulasyp, arǵy jaǵy kásipke aınalyp jatyr. Qazir dombyra jasaý kásibinde júrgenime 4 jyl boldy. Baıqaýǵa qatysýdaǵy maqsatym – tájirıbe jınaý. Ózimde qandaı kem-ketik bar? Kimnen qandaı jaqsy bilim úırene alamyn? Sol úshin keldim, – deıdi jas dombyra jasaý sheberi.
Búgingi baıqaý týraly senator Darhan Qydyráli de oń pikir bildirdi.
– «Naǵyz qazaq – qazaq emes, naǵyz qazaq – dombyra» deımiz ǵoı. Biraq sol dombyrany jasaýshy sheberlerdiń jaı-kúıi qalaı degen suraq birazdan beri qoǵamdy tolǵandyryp júrgen. Bul týraly biz arnaıy depýtattyq saýal da kótergen edik. Bul jarysqa, birinshiden, jastardyń kelip jatqany qýantady. Bizdiń elimizde osy dombyra jasaý sheberligine bet burǵan kóp jastar bar eken. Bul tek Qosshy ne Aqmolanyń ǵana emes, búkil elimizdegi jas sheberlerge serpin berip, yntalandyratyn, dombyra sheberligin jańa deńgeıge kóteretin úlken baıqaý bolady ǵoı dep úmittenemin, – deıdi depýtat.
Baıqaý qorytyndysy boıynsha bas júldeni almatylyq sheber Mókúsh Aıtýar jeńip aldy. Birinshi oryndy Astana qalasynyń ókili Arǵynov Babyr ıelendi. Ekinshi oryn qyzylordalyq Alpash Ulyqbekke buıyrdy.
Úshinshi oryn eki qatysýshyǵa berildi. Atap aıtqanda, almatylyq Asanhan Totaı men Mamyt Meırambek júldeli orynnan kórindi. Al arnaıy júldelerge Astana qalasynan Ábilhan Ádilethan, almatylyq Jamanbalınov Asylan men Akymjan Saıat ıe boldy. Sondaı-aq, baıqaýǵa qatysqan ózge qatysýshylarǵa da yntalandyrý syılyqtary tabystaldy.
Aıta keteıik, Naýryz meıramynda 11 myń dombyrashy Qazaqstan rekordtar kitabyna jańa jetistik engizbek.