Jas almatylyq IT-mektebin ashty
Elnur Seıitjanov - aqparattyq júıeler magıstri. Búginde Avstralııanyń «Aspose» kompanııasynda qashyqtyqtan jumys isteıdi, Halyqaralyq aqparattyq tehnologııalar ýnıversıtetinde Web-technology boıynsha sabaq beredi.
«Aqparattyq tehnologııalar damyǵan saıyn mamandar tapshylyǵy sezile bastady. Osylaısha, «Decode» baǵdarlamalaý mektebin ashý ıdeıasy keldi», - deıdi jas IT-mamany. 
Onyń aıtýynsha, atalǵan mekteptiń 300-den astam túlegi Qazaqstanda jáne shetelde IT-kompanııalarda jumys isteıdi.
«Bizdiń oqýshylar sporttyq baǵdarlamalaý boıynsha olımpıadalarda júldeli oryndarǵa ıe bolyp júr. Atap aıtqanda, bizdiń bir túlegimiz Infomatrix-Asia halyqaralyq IT-konkýrsynda birinshi oryn alyp, SDÝ-da oqý grantyn jeńip aldy», - dep atap ótti Elnur.
Baǵdarlamalaý mektebiniń fılıaly Astanada da ashylǵan.
«Bıyl Jastar jyly dep jarııalandy. Osyǵan oraı biz neǵurlym kóp básekege qabiletti jas mamandardy daıarlaýdy josparlap otyrmyz. Osy maqsatta Qazaqstannyń barlyq óńirlerin qamtıtyn onlaın-kýrstar ashý kózdelýde», - dedi E. Seıitjanov.
Onyń aıtýynsha, qazirgi tańda Qazaqstandaǵy baǵdarlamalaýdyń IT-ortalyqtary Almaty men Astanada, alaıda elimizdiń ózge de óńirlerinde talantty adamdar jeterlik.
«Bilim berý sapasy álemdik standartqa sáıkes bolýy úshin men sheteldik IT-kompanııalarda jumys istep, semınarlarda oqytýshylarmen tájirıbemmen bólisemin. Olar óz kezeginde bizdiń stýdentterge úıretedi. Halyq «Álemdi ózgertkiń kelse - ózińnen basta» dep beker aıtpaǵan», - dep túıdi oıyn Elnur Seıitjanov.
Avtor: Gúlzat Sahova
