Japonııa premer-mınıstri Konstıtýtsııaǵa ózgerister engizý nıetin rastady
ASTANA. KAZINFORM — Japon premer-mınıstri Sanae Takaıchı jeksenbi kúni el Konstıtýtsııasyn qaıta qaraý nıetin qýattap, soǵystan keıingi negizgi zań «zaman talabyn kórsetý úshin júıeli túrde jańartylyp otyrýy kerek» dep atap ótti, dep habarlaıdy Kyodo.
Takaıchı Konstıtýtsııa kúnine oraı konstıtýtsııalyq reforma jaqtastarynyń jınalysyna joldaǵan beıneúndeýinde áleýetti túzetýlerdi jurtshylyqqa dáıekti túrde túsindiretinin málimdedi. Onyń sózinshe, bıleýshi Lıberaldy-demokratııalyq partııa (LDP) basqa partııalardyń qoldaýymen Parlamentte talqylaýdy jalǵastyryp, sheshimderge qol jetkizýge tyrysady.
Kyodo News júrgizgen sońǵy saýalnamaǵa sáıkes, japondardyń 73%-y konstıtýtsııalyq ózgeristerdi ilgeriletýde partııaaralyq keń konsensýsqa basymdyq berilýi tıis dep sanaıdy.
— Talqylaý tek talqylaý úshin júrgizilmeýi kerek. Saıasatkerler azamattardyń senimin aqtap, nátıjege baǵyttalǵan pikirtalas júrgizýge mindetti, — dedi Takaıchı.
Konservatıvti kózqarastaǵy saıasatker retinde tanylǵan premer-mınıstr ekinshi dúnıejúzilik soǵystan keıin kúshine engen Konstıtýtsııaǵa alǵash ret ózgeris engizýdi kózdep otyr. Reformanyń yqtımal baǵyttarynyń biri — Japonııanyń soǵys júrgizý quqyǵynan bas tartýyn bekitetin jáne soǵystan keıingi patsıfızmniń negizi sanalatyn 9-bap.
Ózgeristerdi qabyldaý úshin Parlamenttiń eki palatasynda depýtattardyń úshten ekisiniń qoldaýy, keıin jalpyulttyq referendýmda kópshiliktiń maquldaýy qajet. LDP aqpandaǵy saılaýda Ókilder palatasynda úshten eki oryn alyp, odaqtastarymen birge Keńesshiler palatasynda da osy mejege jaqyndady.
Sáýirde ótken LDP sezinde Takaıchı kelesi partııalyq sezge deıin ózgerister usynysyn engizýdi josparlap otyrǵanyn aıtty.
Jeksenbidegi jıynda burynǵy mınıstrler kabınetiniń arnaıy keńesshisi Tomohıko Tanıgýtı negizgi baptarǵa nazar aýdarýǵa shaqyrdy.
— 9-bap negizgi másele bolyp otyr. Ekinshi deńgeıli taqyryptarǵa aýysyp ketpeý mańyzdy, — dedi ol.
Sonymen qatar, el boıynsha qoldanystaǵy Konstıtýtsııany qorǵaýǵa arnalǵan mıtıngiler men demonstratsııalar ótti. Tokıodaǵy bir aktsııada pýblıtsıst Sınobý Esıoka memlekettik týdy qorlaýǵa qylmystyq jaýapkershilik engizý bastamasyn synǵa aldy.
— Men Konstıtýtsııany óz balamdaı saqtap, kelesi urpaqqa jetkizgim keledi, — dedi Osaka prefektýrasyndaǵy mıtıngte soǵysty bastan ótkergen 87 jastaǵy Harýka Vatanabe.
Buǵan deıin Japonııa Qazaqstanǵa qandaı jobalardy atqarýǵa kómektesetini týraly jazǵan bolatynbyz.
