Jarys ústinde arǵymaǵyn aıyrbastamas bolar - K. Saǵadıev
ASTANA. 29 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń Konstıtýtsııasyna ózgeris engizý máselesi boıynsha QR Prezıdentiniń respýblıkalyq referendým taǵaıyndaýy týraly» máseleni talqylaý barysynda depýtat Kenjeǵalı Saǵadıev referendým bastamashyldyǵyn qoldaı kele, N. Nazarbaev bastaǵan reformalardyń ary qaraı jalǵasýyna tıisti jaǵdaıdy qamtamasyz etý qajettigin aıtty.
Sóz arasynda depýtat Elbasynyń Qazaqstan memleketin qalyptastyrý barysy men odan keıingi jyldary halqynyń mereıin asyrýǵa sińirgen eńbekterine toqtala kele, álemniń Qazaqstandy tanýyna N. Nazarbaevtyń tikeleı qosqan úlesterin de aıtyp ótti.
«Prezıdent N. Nazarbaev álemde bedeldi, onyń pikirimen úlken-kishi sanasatyn qaıratker ekenine bizderdiń de kózimiz jetti. Elbasynyń syndarly saıasaty álem elderinen kóptegen qoldaý taýyp, óz ishindegi reformalar toqtamaı, ony eshnársege alańdamaı júrgizýge múmkindik berdi. Onyń jemisti nátıjesi barshańyzǵa belgili», - dedi K. Saǵadıev.
Sonymen qatar jurt aldynda óte kúrdeli onjyldyqtyń turǵanyn atap aıtqan depýtat, osy merzim ishinde eldiń áleýmettik-ekonomıkalyq salasyn barynsha jaraqtandyryp, joǵary deńgeıge jetkizý qajettigin atap ótti. «Biletin adamǵa bul - jarys, báseke. Ony jeńý úshin osyndaı uly iske tájirıbesi mol, barynsha shyńdalǵan qaıratker basshy qajet. Ol - ótken hám bolashaq reformalardyń arhıtektory N. Nazarbaev. Jarys ústinde arǵymaǵyn aıyrbastamas bolar. Biz de álem tanyǵan qaıratkerimizdi aldaǵy álemdik deńgeıdegi báıgege qosaıyq. El tizginin N. Nazarbaevqa tapsyraıyq. Sonda júldeli bolatynymyzǵa kúmán joq», - dedi K. Saǵadıev.
