Japon ımperatory Narýhıto taqqa otyrdy
Mártebeli meımandar qatarynda Japonııa Premer-Mınıstri Sındzo Abenyń arnaıy shaqyrýymen Tokıoǵa kelgen Qazaqstannyń Tuńǵysh Prezıdenti - Elbasy Nursultan Nazarbaevtan bólek Shvetsııa, Esvatını, Lesoto, Kambodja, Býtan, Tongo, Nıderlandy, Ispanııa, Belgııa, Malaızııa korolderi, arab elderiniń sheıhtary, Túrikmenstan, Qyrǵyzstan, Togo, Nıger, Fınlıandııa, Vengrııa, Kenııa, Bangladesh syndy elderdiń prezıdentteri boldy.
Resmı hattamaǵa sáıkes, jergilikti ýaqyt boıynsha saǵat 12:50-de eldiń Premer-Mınıstri, japon Parlamentiniń Ókilder jáne Keńesshiler palatalarynyń spıkerleri, Joǵarǵy sot tóraǵasy, olardyń sońyn ala ımperator otbasynyń músheleri saltanatty shara bastalǵan zalǵa ótti. Al saǵat 13:00-de ımperator bıliginiń nyshany eki mórtańba men qasıetti regalııa sanalatyn qylysh pen alqany ustaýshylardy janyna ertken Narýhıto kirip, ımperator taǵy - Takamıkýraǵa otyrdy. Іle-shala patshaıym Masako da kelip, Mıtedaı taǵyna otyrǵannan keıin gong soǵylyp, jınalǵan meımandar ornynan turdy. Osydan keıin saraı qyzmetshileri ımperator men patshaıym otyrǵan taqty kólegeılep turǵan perdeni ashty.
Saltanatty rásimge Narýhıto tek ımperatorǵa ǵana arnalǵan «gosokutai» dep atalatyn dástúrli kıimin kıip kelipti. Oń qolyna ulylyq nyshany sanalatyn «onshaku» (aǵash asataıaq) ustaǵan. Imperatordyń taqqa otyrý saltanatynyń ulylyǵyn qylysh, sadaq, qoramsa, aıbalta jáne qalqannan turatyn saltanatty zattar bildirdi.
Kelesi sátti japon úkimetiniń basshysy ımperatordyń dál aldyna kelip turdy. Munan soń Narýhıto japon halqyna Joldaýyn arnady.
«Men konstıtýtsııaǵa saı Japonııa memleketiniń jáne halqynyń birligi nyshany retindegi óz mindetimdi oryndaýǵa ant beremin», - dedi Narýhıto.
Imperator japon halqyna joldaýyn jarııalap bolǵannan keıin Sındzo Abe ımperatordy taqqa otyrýymen quttyqtady.
«Biz beıbit, jarqyn bolashaq qurý úshin, Japonııanyń úmitin aqtaý úshin barlyǵyn jasaımyz», - degen Sındzo Abe sóz sońyn: «Go-sokýı o sıýký-sıte tenno heıka bandzaı!» (Taqqa otyrý qurmetine oraı, Uly mártebeli ımperator jasasyn!) dep aıaqtady.
30 mınýtqa sozylǵan saltanatty shara 21 zeńbirekten otshashý atýmen aıaqtaldy.
Aıta keterligi, Japonııa 22 qazan kúnin ulttyq mereke dep jarııalaǵan. Osyǵan oraı eldegi kishigirim qylmystar úshin sotty bolǵan 550 myńǵa jýyq adamǵa raqymshylyq jasalyp otyr.
Buǵan deıin habarlaǵanymyzdaı, Japonııa úkimeti 2019 jyldyń 1 mamyrynda jańa ımperııalyq kezeńniń bastalǵanyn jarııalady. Bul kezeń «Reıv» dáýiri dep atalady - bul ataý qazaq tilinde aýdarǵanda «tártip», «úılesim» jáne «gúldengen álem» degen maǵyna beredi. Qazirgi «Heıseı» dep atalatyn dáýirdiń ataýy qytaı ádebıetinen alynǵan bolatyn, ol «álem jetistigi» degen maǵyna beredi. Ol dáýir 1989 jyldyń qańtarynda, Hırohıto ımperator qaıtys bolǵan kezde bastalǵan edi. Onyń uly Akıhıto Japonııanyń 125-shi ımperatory retinde 30 jylǵa jýyq ýaqyt bılik qurdy. Sóıtip óz erkimen taqtan bas tartty. Ol bul sheshimin jasynyń ulǵaıǵanymen túsindirdi. Hanzada Narýhıto taqqa 1 mamyr kúni otyrdy.
1989 jyldyń 7 qańtarynda Japonııanyń murager hanzadasy retinde resmı jarııalanǵan Narýhıtonyń birqatar ulttyq jáne sheteldik nagradasy, sonymen qatar Oksford ýnıversıtetiniń doktory syndy qurmetti ataqtary bar. Ol sý ekojúıesiniń problemalaryna aıryqsha nazar aýdaryp, sý resýrstary men sanıtarııa problemalaryna arnalǵan halyqaralyq ǵylymı forýmdarda jıi baıandama jasaǵan. Japondardyń ortaǵasyrlyq poetıkalyq janry «vaka» dástúrli poezııasymen áýestenip, alt aspabynda oınaıdy.
