Jánibek Álimhanulynyń boks keshinde taǵy kimder judyryqtasady

ASTANA. KAZINFORM — Qazaqstandyq boksshy, orta salmaqtaǵy WBO jáne IBF chempıony Jánibek Álimhanulynyń 5 sáýirdegi boks keshinde taǵy kimderdiń judyryqtasatyny belgili boldy.

Atalǵan boks keshinde búginde ulttyq qurama sapynda el namysyn qorǵap júrgen aǵaıyndy Sabyrhandar sharshy alańda kásipqoı boksta baqtaryn synap kórmek. Aǵaıyndy boksshylardyń qarsylasy ázirge anyqtalmaǵan.

Sondaı-aq, osy kúni Sultan Zaýyrbek pen Batyr Júkembaev ta boks keshiniń kórigin qyzdyrady dep josparlanyp otyrǵany belgili boldy. 

Sonymen qatar 5 sáýir kúni Ózbekstannyń eki dúrkin Olımpıada chempıony atanǵan Bahodır Jalolov ta osy keshte kásipqoı bokstaǵy sheberligin kórsetpek. 

5 sáýir kúngi elordamyzda ótetin iri kásipqoı boks keshiniń basty jekpe-jegi qazaqstandyq Jánibek Álimhanuly men frantsýzdyq Anaýel Ngamıssenge arasynda ótedi.

Búgin osy jekpe-jek keshine oraı Astanada arnaıy baspasóz máslıhaty ótti.