Jánibek Álimhanuly: basty maqsat tórt beldikti biriktirý

ASTANA. KAZINFORM — Orta salmaqtaǵy WBO jáne IBF tujyrymy boıynsha chempıony, qazaqstandyq kásipqoı boksshy Jánibek Álimhanuly Kazinform tilshisine aldaǵy jospary týraly aıtyp berdi.

Boksshy aldaǵy jekpe-jekginde eki birdeı chempıondyq beldigin qorǵaıtynyn aıtty. 

— Iá, barlyq jaǵyn qarastyryp, oılastyryp jatyrmyz. Buıyrtsa, biz aldaǵy aıqasymyzda WBO jáne IBF beldikterin qorǵaımyz. Osyǵan deıin, WBO tujyrymy boıynsha mindetti qarsylas retinde Hamza Shıraz belgilengen bolatyn. Shataspasam, odan keıin 4 qarsylaspen kelissóz júrip, barlyǵy sharshy alańǵa shyǵýdan bas tartty. Qortyndysynda, osy qarsylasym judyryqtasýǵa kelisim berdi, — dedi Jánibek.

Sonymen qatar, qazaqstandyq boksshy aldaǵy ýaqytta orta salmaqtaǵy barlyq chempıondyq tıtýldy biriktirý basty maqsat ekenin aıtty. 

— Qazirgi ýaqytta qolymyzda eki chempıondyq tıtýl bar. Promoýterlik kompanııa (TopRank) WBC jáne WBA beldikterin biriktirý maqsatynda jumystar atqaryp jatyr, — deıdi álem chempıony.

Búgin Astanadaǵy «Barys Arenada» Jánibek Álimhanulynyń 5 sáýirge josparlanǵan kezekti jekpe-jegine arnalǵan baspasóz máslıhaty ótti.

Buǵan deıin habarlanǵandaı,  QR Týrızm jáne sport mınıstri Erbol Myrzabosynov Jánibek Álimhanulynyń kezekti jekpe-jegi Qazaqstanda uıymdastyrylatynyn aıtqan bolatyn. 

Aıta keteıik, Jánibek Álimhanulynyń 5 sáýir Astana qalasynda judyryqtasatyn qarsylasy frantsııalyq boksshy — Anaýel Ngamıssengý. Ol osyǵan deıin 14 kezdesý ótkizip, barlyǵynda jeńiske jetken. Onyń 9-yn merziminen buryn jeńgen.