Jańa jaǵdaıdaǵy jańǵyrý

ASTANA. QazAqparat - Memleket basshysy 2014 jyldyń qazan aıynda elimizdegi kompanııalar qyzmetiniń tıimdiligin arttyrý maqsatynda júrgizilip jatqan reformalarǵa sáıkes «Samuryq-Qazyna» qory kompanııalar tobyn transformatsııalaý baǵdarlamasynyń tusaýyn kesti.

«QazMunaıGaz» UK» AQ osy baǵdarlamany iske asyrýǵa alǵashqylardyń biri bolyp kiristi. Qazirgi tańda kompanııa bul úrdiste aıtarlyqtaı jetistikterge jetti.

Ekonomıkalyq ıadrodaǵy múmkindikter kózi

Qazirgi kezeńdegi naryqtyń qatań básekelestik jaǵdaıyndaǵy iskerlik tájirıbede tıimdiliktiń standarttary men basymdyqtary rynoktaǵy oıynshylardyń jaǵdaıy sııaqty jyldam ózgeredi. Mundaı jaǵdaıda kúshtilerdiń nemese az óndiristik shyǵyndarmen tıimdi jumys isteıtinderdiń ǵana aıy ońynan týady. Kompanııa búgingi rynoktyń talaptaryna neǵurlym jyldam beıimdelip jańa tehnologııalardy jedel ıgeretin bolsa, soǵurlym ekonomıkalyq ósý jolynda óz «tolqynyn» tabatyn bolady.

Osy jańǵyrý úrdisteriniń qaq ortasynda ulttyq ekonomıkanyń ıadrosy - «Samuryq-Qazyna» qory bar. Qazir ol korpo­ratıvtik damý úrdisterin jalpy transformatsııalaýdy odan ári jalǵastyrýda.

Búginde Qazaqstandaǵy ártúrli deńgeıde, onyń ishinde ekonomıkanyń ıadrosynda atqarylyp jatqan ekono­mıkalyq reformalardyń maqsaty - ulttyq ekonomıka qurylymyndaǵy shıkizattyq emes sektorlardyń úlesin arttyrý jáne dástúrli shıkizatqa táýeldilikten shyǵý. Halyqaralyq sarapshylar bul maqsatqa jetýdegi negizgi úrdisi retinde ınklıýzıvtik damýǵa erekshe basymdyq beredi. Bul degenimiz kompanııanyń, salanyń jáne tutas ulttyq ekonomıkanyń ósimi barlyq áleýmettik toptardyń músheleriniń qatysýymen júzege asyrylyp, qoǵamdaǵy áleýmettik qıyndyqtardy jeńildetedi jáne uzaq merzimdik aýqymda gúldený jaǵdaıyn qamtamasyz etedi degen sóz.

«QazMunaıGaz» kompanııasyn jańǵyrtý úrdisterine arnalǵan «Adam kapıtaly - transformatsııalaýdaǵy jetis­tik kepili» HR-forýmynda sóıle­gen sózinde «Samuryq-Qazyna» UÁQ basqar­masynyń tóraǵasy Ómirzaq Shókeev álem­dik daǵdarys ahýaly tereń­dep otyrǵan jaǵdaıda Kompanııa toby júzege asyryp jatqan transformatsııa sharalary bizdiń ekonomıkamyzdyń ıadrosyndaǵy barlyq bólimshelerdiń tıimdi jumys isteýine negiz bolady, dep atap kórsetti. Osy úrdister sheńberinde basqarý júıesi jańarady, ózderiniń jeke fýnktsııalary men mindetterin oryndaýǵa jumylǵan qyzmetkerlerdiń múmkindigi artady.

- Qordyń bas ofısinde biz transformatsııalaý úrdisin baǵdarlamanyń negizgi basymdyqtaryn anyqtaýǵa já­ne strategııany belgileýge, sonymen birge, basqarý júıesiniń utymdy mo­delin tabý ádisterimen bastadyq. Bul rette biz ofıstik qyzmetkerlerdiń qyz­metine berilgendigin jáne olardyń óz jumysynda barynsha tıimdilikke qol jetkizý sıpattamalaryn anyqtadyq, - dedi «Samuryq-Qazyna» UÁQ basshysy.

Sonymen birge, qazirgi transformatsııa jaǵdaıynda ońtaılandyrý úrdisterin júrgizýdiń tek progressıvti úrdis qana emes, sonymen birge qyzmetkerlerdiń áleýmettik jaǵdaılaryna erekshe áseri bolatyndyǵyn eskerý kerek. Sondyqtan bul jumys ońtaılandyrýdyń qadamdary men basymdyqtaryn tańdaý kezinde ádildikti jáne sezimtaldyqty qajet etedi, dep atap kórsetti Ómirzaq Shókeev.

Ózgerý bıiginde

«QazMunaıGaz» UK AQ transformatsııa baǵdarlamasyn is júzine asyrýǵa Kompanııalar tobynda alǵashqylardyń biri bolyp kiristi jáne qazirgi kezde bul salada aıtarlyqtaı jetistikterge qol jetkizdi.

«QazMunaıGaz» UK AQ-tyń basqarma tóraǵasy Saýat Myńbaevtyń aıtýynsha, kompanııanyń jańa jaǵdaıda jemisti qyzmet atqarýy úshin júıeli ózgerister júrgizý kerek. Atap aıtqanda, QMG dırektorlar keńesi arqyly aktıvterge basshylyq jasaýdan, ınvestorlar portfeli tujyrymynan bas tartyp, óndiristik aktıvterdi operatıvtik basqarý úrdisine kóshý kerek. Ol úshin sýbholdıngterdi kompanııanyń kor­poratıvtik ortalyǵyna ıntegratsııalaý esebinen basqarý baspaldaqtarynyń sanyn toǵyzdan ekige deıin azaıtý qajet. Birinshi kezekte HR-qyzmetteri, aqparattyq tehnologııa, bolashaqta býhgalterııa jáne qazynashylyq kiretin biryńǵaı qyzmet kórsetý ortalyǵyn qurý qajet.

QMG basshysynyń aıtýynsha, tıim­diliktiń negizgi parametrleri boıynsha kompanııa erekshe bir ósý dınamıkasyn kórsetken joq. «QazMunaıGaz» AQ-tyń ósý kórsetkishteri reseılik kom­panııalardyń osyǵan sáıkes kórset­kishterinen, ol, ol ma, jahandyq rynok kóshbasshylarynyń kórsetkishterinen kóp alshaq qalýda.

Jalpy alǵanda, bul saladaǵy problemalar «QazMunaıGaz» kompanııalary tobynda adam resýrstaryn basqarý qurylymy men úrdisteri standarttarǵa sáıkestendirilmegen. Іs júzinde árbir kompanııa ádistemelik turǵyda óz saıasatyn júrgizgen. Kóptegen uıymdarda qyzmetkerlerdiń kásibı biliktiligin jetildirýge baǵyttalǵan sharalar júzege asyrylmaǵan. Osy máselelerdi eskere kelip, búginde QMG-de júktelgen mindetterdi atqarýda bir-birin qaıtalaýshylyqty joıý, qabyldanǵan sheshimderdiń ońtaılylyǵyn jáne jedeldiligin arttyrý esebinen kompa­nııanyń tıimdiligin kóterýge múmkindik beretin jańa operatıvtik modelder óndiriske engizilýde.

Biliktiliktiń jańa úlgisi

QMG-nyń adam resýrstaryn basqarý jáne eńbekaqy jónindegi basqarýshy dırektory Serik Ábdenovtiń bergen derekteri boıynsha, kompanııada júr­gizilip jatqan kásibı mindetterdi standarttaý ádisi barlyq qyzmetkerlerdiń atqaratyn mindetteriniń kólemin anyq­taýǵa múmkindik beredi. Eger buryn qyzmetkerlerdiń mindetterin aıqyndaýda naqtylyq jáne júıelilik jetispeı jatatyn bolsa, endi árbir qyzmetker jalpy óndiristik úrdisterdegi óziniń mindetin barynsha jete túsinip, maqsatty, eń bas­tysy nátıjeli jumys isteıtin bolady.

Mundaı ózgerister aldymen basqarý vertıkaliniń joǵary deńgeıinde bas­taldy. Atap aıtqanda, korporatıvtik ortalyqta adam resýrstaryn jáne eńbekaqy tóleýdi basqarý tetikteri qaıta qaraldy, qyzmetkerler sanyn qysqarta otyryp departamenttiń qurylymy ózgertildi. Sonymen birge, «Samuryq-Qazyna» AQ-tyń korporatıvtik ýnı­versıteti bazasynda adam resýrstaryn basqarýǵa birikken qyzmet kórsetý ortalyǵyn qurý qolǵa alyndy.

Sonymen birge, dıagnostıka nátı­jelerine sáıkes kadrlardy irikteýdiń burynǵy júıesinde birqatar álsiz qyrlary men ótkir problemalary bolǵan­dyǵy anyqtaldy. Bul eń aldymen, mamandardy irikteý tájirıbesinde júıeliliktiń jáne ashyqtyqtyń bolmaýyna, bul saladaǵy jumysty uıymdastyrýdyń múlde jetildirilmeýine qatysty.

Adam resýrstaryn basqarý mindet­teriniń jańa modeli HR-qyzmeti qury­lymyna fýnktsııalyq qyzmettiń kórsetkishterine jáne úrdisterine standartty kózqarasty qalyptastyrýdy talap etedi. Jalpy, qyzmet kórsetý ortalyǵy jobasyn is júzine asyrý búginde óziniń sheshýshi sátine jetti. Kadrlardy irikteýde ashyq konkýrstyq tásildi engizý, adam resýrstaryn basqarý qurylymyn biregeılendirý sııaqty birshama bastamalar korporatıvtik orta­lyqta jáne holdıngtiń birqatar jetekshi kompanııalarynda is júzine asyryla bas­tady.

Qazirgi tańda transformatsııalaýdyń óte mańyzdy úderisteriniń biri is júzine asyrylý ústinde. Osy jumys sheńberinde birinshi kezekte is júzine asyrylatyn jobalardyń mańyzy anyqtalady, paıdalylyǵy eseptelinedi jáne is júzinde ol qalaı jumys isteıtindigi sara­lanady. Sóıtip, jaqyn arada «QazMunaıGaz» UQ AQ-tyń barlyq kom­panııalar tobynda adam resýrstaryn basqarý mindetteriniń jańa modelin naqty is júzine asyrý jumystary bastalady.

Josparlanǵan ózgeristerdi iske asyrý HR-qyzmetiniń óndiristik bólim­dermen seriktestigi, merıtokratııa, sonymen birge, barlyq qyzmetkerlerdi strategııalyq maqsattarǵa jetýge ju­myldyrý sııaqty bazalyq úrdister negizinde júrgiziletin bolady. Jobany is júzine asyrýǵa kompanııanyń trans­formatsııalaý jónindegi barlyq bólimderiniń, Korporatıvtik ortalyqtyń jáne basqa qurylymdardyń ókilderi túgel jumyldyrylatyn bolady.

Transformatsııalaýdaǵy HR-diń róli

Alda turǵan ózgeristerdiń aýqymyn eskere kelgende, alǵa qoıǵan maqsatqa jetýdiń basty talaby kompanııadaǵy adam kapıtalyn tıimdi basqarý bolyp tabylady. Tek qabiletti, talapty durys túsine biletin qyzmetkerler ǵana jalpy kompanııanyń tıimdiligin arttyrýǵa qol jetkize alady. Osyǵan baılanysty jańa korporatıvtik mádenıet qurýǵa baǵyttalǵan HR-qyzmetine aıryqsha ról júkteledi.

Kompanııany transformatsııalaýdaǵy barlyq bastamalardy is júzine asyrýda tek osy qurylymǵa kóshbasshy bolý jaýapkershiligi júktelgen. Jumys berýshi jáne jumysshy arasyndaǵy ishki kommýnıkatsııa qurýda biryńǵaı kózqarasty qalyptastyrý maqsatynda «QazMunaıGaz» UK» AQ kompanııalar toby boıynsha biryńǵaı ishki kommýnıkatsııalar júıesin qurýdyń tıptik erejesi belgilendi jáne bekitildi.

Іshki kommýnıkatsııa mindeti - uıym­daǵy jumys berýshi jáne jumysshy arasyndaǵy tikeleı baılanys ornatý jáne qoldaý, ártúrli sharalardyń maqsattary men mindetteri týraly qyzmetkerlerdi der kezinde habardar etý, sonymen birge, kásiporyndaǵy áleýmettik-psıhologııalyq ahýaldy baqylaýda ustaý bolyp tabylady. Taǵy bir aıta ketetin másele, ishki kommýnıkatsııa júıesi áleýmettik, turmystyq, óndiristik jáne basqa máselelerdi tal­qylaý úshin eńbek ujymy men bas­shylardyń josparly jáne jospardan tys kezdesýlerin uıymdastyrýdy kózdeıdi. Sonymen birge, toqsan saıyn bir ret kún tártibindegi eń ótkir máseleler bo­ıynsha kásipodaq ókilderimen kezdesýler ótkizilýi qajet. Atap aıtqanda, bul ujymdyq sharttyń oryndalý jaǵ­daı­lary, eńbek tártibiniń jaǵdaıy, eńbek ujymynyń ótinish-shaǵymdary, eńbekti qorǵaý jáne onyń qaýipsizdigi, áleýmettik jeńildikter men ótemaqylar berý máseleleri bolýy múmkin.

Qazirgi kezde «QazMunaıGaz» UK» AQ-tyń kóptegen kompanııalary barynsha tolyq aqparat almasý maqsatynda korporatıvtik, aqparattyq saıttar qurý, beınejarnamalar úshin monıtorıngter jasaý, korporatıvtik gazet uıymdastyrý, qyzmetkerlerdiń ótinish-shaǵymdaryn jınaý úshin aq­parattyq qabyrǵa gazetterin jáne jáshikterdi uıymdastyrý jumysyn jalǵastyrýda. Qyzmetkerlerdiń barlyq ótinish-shaǵymdary jan-jaqty saraptaýdan ótkiziledi. Olardyń ishindegi eń mańyzdy degen máseleler birikken sheshimder qabyldaý úshin eńbek ujymy men basshylardyń kezdesýleriniń kún tártibine shyǵarylady. Búginde ishki kommýnıkatsııa júıesi áleýmettik mańyzdy máselelerdi sheshý úshin jáne pikir almasý úshin, sonymen birge «QazMunaıGaz» UK AQ kompanııalar tobyndaǵy óndiristik úrdisterdi odan ári damytý maqsatyndaǵy usynys-pikirlerdi qabyldaý úshin de keńinen paıdalanylady.

Qyzmetkerlerdi baǵalaý júıesi

Transformatsııalaý sheńberinde QMG-ǵa engizilgen ósimniń jańa modeli retinde ákimshilik, aqparattyq, yntalandyrý maqsattaryn kózdeıtin baǵalaý júıesin engizý bolyp tabylady. Bul rette uzaq merzim ishinde qyzmetkerlerdiń eńbegine baǵa berý nátıjesi qanaǵattanǵysyz bolyp kelgen jaǵdaıda qyzmetkerlerdi attestatsııalaý júıesi paıdalanylatyn bolady.

Qyzmetkerlerge baǵa berýdiń jańa ádistemesi úsh komponenten turady: maqsatqa jetýdiń nátıjeliligin baǵalaý, kásibı bilimi men biliktiligin baǵalaý, sonymen birge qabilettiligin baǵalaý. Osy oraıda quzyrettilik modeliniń bel­sendiligin arttyrýǵa erekshe kóńil bólinedi. Quzyrettilik modeli - kor­poratıvtik jáne menedjerlik eki bloktan turady. Óz kezeginde bul bilik­tiliktiń árqaısysy tórt satyly ın­dıkatorlardan quralǵan. Jańa uıymdastyrýshylyq modeli aıasynda quzyrettilik biryńǵaı bolyp keledi. Laýazymdyq ósý, kásibı damý, yntalandyrý deńgeıi boıynsha ákimshilik sheshimder 9-kletkaly mat­rıtsalar negizinde qurylatyn bolady. Qazirgi kezde kompanııada 9-kletkaly matrıtsa synalatyn eki iri joba júzege asyrylýda. Birinshi - bul QMG kompanııalar tobynyń Biryńǵaı kadrlyq rezervin irikteý. Bul rette 30 rezervıske óndiristik baǵyt boıynsha taǵy 30 adam qosylady. Jyl aıaǵyna deıin QMG kompanııalar tobynyń Biryńǵaı kadrlyq rezerviniń sany 60 adamnan quralatyn bolady. Ekinshi joba - menedjerlik quramdy baǵalaý. Búginde osy joba aıasynda QMG korporatıvtik ortalyǵynan 105 basshy jáne enshiles jáne táýeldi kásiporyndardan 11 basshy iskerlik quzyrettiligi dárejesin anyqtaý jónindegi onlaın testileýden ótti. Osy jumystyń qorytyndysy da kompanııa boıynsha anyqtalǵan nátıjeler negizinde býyn almasýynyń Jospary belgilenetin bolady. «QazMunaıGaz» korporatıvtik ortalyǵy merıtokra­tııa qaǵıdalaryn is júzine asyrý sheńberinde bos ákimshilik oryndarǵa úmitkerler irikteýde tolyǵymen ashyq konkýrstyq júıege kóshti. Bos oryndar boıynsha aqparattar mindetti túrde kompanııanyń korporatıvtik saıtynda, áleýmettik jelilerde jarııalanady. Serik Ábdenovtiń aıtýynsha, sońǵy eki jyl ishinde 119 bos oryn týraly habarlandyrý jarııalanǵan. Úmitkerlerdiń ótinishi is júzinde Qazaqstannyń barlyq óńirleri boıynsha kelip túsedi. Qazirge deıin olardyń sany 6000-ǵa jetti. Alaıda, olardyń ishinde 300-i ǵana QMG-nyń kásibı talaptaryna sáıkes keledi.

QMG kadrlar irikteýde durys kór­setkishterge qol jetkizý úshin barlyq tıimdi tásilderdi qoldanady. Naryqtyq talaptarǵa sáıkes jalaqy júıesin qa­lyptastyrý, sonymen birge, jańa bir­yńǵaı kadrlyq rezerv júıesin qoldaný tıimdiligin arttyrý máseleleri boıynsha óskeleń talaptardy qoldanysqa engizý kózdelýde.

HR úrdisterin avtomattandyrý

HR úrdisterin avtomattandyrý maq­satyna qaǵazbastylyqtan qutylyp, HR qurylymy jumysyn avtomattandyrý formatyna engizý máseleleri jatady. Osy baǵyt boıynsha búginde biryńǵaı eńbekaqy júıesin, kadrlyq is júrgizý, jumys ýaqytyn esepteý, eńbekaqy qoryn josparlaý, áleýmettik ahýaldy monıtorıngileý júıelerin avtomattandyrý boıynsha jumystar júrgizilýde.

Transformatsııalaý jáne avtomat­tandyrý boıynsha sarapshy Saıat Qaıgeldınov atap kórsetkendeı, avtomattandyrý úshin baza retinde bıznes baǵyt boıynsha kompanııaǵa táýeldi jáne seriktes «Munaı jáne gazdy barlaý jáne ıgerý», «Neftservıs» kompanııalarynda 2014 jyly Biryńǵaı eńbekaqy júıesin kirgizý jónindegi ádisteme qoldanylatyn bolady. Bul júıe shtat kestesin, shtattyq ornalastyrýlardy laýazym jáne kásiptiń tıptik anyqtamalary negizinde qurylymdy uıymdastyrý tarıftik setkalar men laýazymdyq jalaqylardyń kestesin qurý úrdisterin avtomattandyrýǵa múmkindik berdi. Saraptaý modýli avtomattyq rejimde QMG basshylaryna, sondaı-aq táýeldi jáne enshiles kompanııalardyń basshylaryna qyzmet­kerler jóninde tıisti sheshimder qabyld­aý úshin qajetti saraptamalyq aqparattar qalyptastyrýǵa múmkindik beredi.

Qazirgi kezde atalmysh modýldi aı­shyqtaý jáne testileý sharasy QMG-ge táýeldi jáne enshiles 6 kompanııa­da ótkizildi. Biryńǵaı eńbekaqy jú­ıesi modýli negizinde «Eńbekaqy qo­ryn josparlaý» modýli jasaldy. Bul qyzmetkerlerdiń kásibı jarnalary, eńbek demalysyna tólenetin aqy, syı­aqy, ótemaqy, jalaqyǵa qosymsha aqy, ústemaqy boıynsha esepteýlerdi qosqandaǵy josparlanǵan shyǵyndar esebin avtomattandyrýdy kózdeıdi. Onyń maqsaty - jumys ýaqytyn únemdeý, jos­parlaý úderisiniń tıimdiligin jáne ashyqtyǵyn qamtamasyz etý bolyp tabylady.

Ústimizdegi jyldyń úshinshi toqsa­nynda «Mańǵystaýmunaıgaz» AQ já­ne onyń munaıservıstik kompanııa­laryndaǵy eńbekaqy qoryn josparlaýdy testileý belgilendi. Sonymen birge, qyzmetkerler boıynsha josparly shyǵyndardy suryptaý jáne irikteý jaǵdaılary boıynsha eseptiń júıeliligin arttyrýǵa múmkindik berý, jalaqy qorynyń josparly shyǵyndary boıynsha esepti avtomattandyrýdy qamtamasyz etý mindetteri de bizdiń josparymyzda tur, deıdi JQKO HR departamentiniń dırektory Álııa Omarova.

Áleýmettik ahýaldy monıtorıngileý máselesiniń mańyzdylyǵyn eskere kelip, qazirgi kezde birqatar kásiporyndarda áleýmettik janjaldardyń aldyn alý jáne olarǵa kúni buryn únqatý úshin qanatqaqty rejımde «Áleýmettik ahýal monıtorıngi» modýli engiziledi. Áleýmettik ahýaldyń barlyq deńgeıin esepke alý úshin arnaıy ádisteme belgilenip, bul júıeni avtomattandyrý jumysy qolǵa alyndy.

Áleýmettik ahýaldy monıtorıngileý jónindegi modýl áleýmettik qıyndyq­tardyń aldyn alyp, áleýmettik janjaldardy boldyrmaýǵa jáne bul prob­lemalardy sheshý sharalaryn bel­gileýge múmkindik beredi. Bul rette qyzmetkerler úshin shaǵymdanýǵa já­ne aqparat alýǵa qolaıly barlyq jaǵ­daılar jasalǵan, - dep atap kórsetti forým barysynda QMG áleýmettik saıa­sat departamentiniń dırektory Erkin Rahymbergenov.

Jumys resýrstarynyń qozǵalysyn, jumys ýaqytyn jáne kadrlardy esepteý júıesin tolyq avtomattandyrý kompanııanyń basqarý júıesiniń jekelegen salalaryndaǵy jumysbastylyqty joıyp, bul úderisterde joǵary nátı­jelerge qol jetkizýge jaǵdaı jasaıdy.

Bıznes-úrdisterdi aýtsorsıngileý

Kompanııanyń básekelestikke qabilet­tiligin arttyrýdyń basty baǵyttarynyń biri - shyǵyndardy barynsha azaıtý, soǵan sáıkes onyń tıimdiligin arttyrý bolyp tabylady. Kompanııalardyń tıimdiligin arttyrýdyń balamaly tásili retinde QMG-de úderisterdi keshendi ońtaılandyrý týraly sheshim qa­byldandy. Osyǵan baılanysty aýtsorsıng qyzmetiniń tıimdi modelin qurý mindeti týyndady. QMG-niń HR baǵyty - bul «Samuryq-Qazyna» qorynyń enshiles kompanııalarynda transformatsııalaý baǵdarlamasyn is júzine asyrý sheńberinde «Jalpy qyzmet kórsetý ortalyǵyn» (JQKO) qurý jónindegi joba. Bul ortalyqtyń basty maqsaty - kompanııanyń tıimdiligin arttyrý, birin-biri qaıtalaıtyn qyzmetterdi boldyrmaý esebinen shyǵyndardy qysqartý, birinshi kezekte kompanııanyń bıznes-úrdisterin standarttaý bolyp tabylady.

- Bizdiń kompanııadaǵy HR úrdisi boıynsha JQKO «Samuryq-Qazyna» korporatıvtik ýnıversıtetiniń bazasynda qurylýda. Atalmysh kezeńde HR úrdisine eńbek qatynastaryn basqarý, syıaqylardy basqarý kompanııanyń áleýmettik baǵdarlamalary jáne ákim­shilik oqytý júıelerin basqarý mindetteri beriledi. Birqatar úrdister 2016 jyldyń sońynda-aq QMG-den kor­poratıvtik ýnıversıtetke beriledi, al 2017 jyly QMG bul jumystardy enshiles kompanııalarda atqaratyn bolady, - dep atap kórsetti «Samuryq-Qazyna» Korporatıvtik ýnıversıteti» dırektory Gúlmıra Raıysova.

Bul keshendi sharalar «QazMunaıGaz» kompanııalaryna jańa ýaqyt talaptaryna sáıkes ekonomıkalyq tıimdilikke qol jetkizý úshin naqty múmkindikter beretin bolady, dep jazady «Egemen Qazaqstan» gazeti.