Jańa Salyq kodeksi kásipkerlik qyzmetti jeńildetedi
ATYRAÝ. KAZINFORM — Jańa zańda kásipkerlerden bereshekti óndirip alýdyń neǵurlym ıkemdi jáne jumsaq tártibi qarastyrylyp otyr. Eger de qaryz mólsheri az bolsa, kompanııalardyń shottary avtomatty túrde buǵattalmaıdy, dep habarlaıdy Memlekettik kirister komıteti.
2026 jyldyń qańtar aıynan bastap Qazaqstanda jańa Salyq kodeksi kúshine enedi. Atalǵan reformany túsindirý úshin Qarjy mınıstrligi Memlekettik kirister komıtetimen birlesip, elimiz boıynsha aqparattyq is-sharalardy ótkizip keledi. Osy jumystyń aıasynda Atyraýda kezekti semınar ótkizilip, onda bıznestegi salyq salý úrdisindegi ınnovatsııalar men ózgerister týraly túsindirilip, kásipkerler salyqtyq retteýdiń jańa jaǵdaıyna durys beıimdelýdiń joldaryna qanyqty.
Atyraý oblysynda munaı-gaz salasy, kólik ınfraqurylymy jáne óńdeý ónerkásibi jaqsy damyǵandyqtan bul óńir Qazaqstan ekonomıkasynda mańyzdy oryn alady. Bul aımaqta iri munaı ken oryndary — Teńiz jáne Qashaǵan ornalasqan. Jumys tıimdiligin arttyrý úshin óndirýshi kompanııalar qajetti jabdyqtar men kórsetiletin qyzmetterdi alý boıynsha merdigerlik jumystardy oryndaıtyn shaǵyn jáne orta bızneske súıenedi. Sondyqtan semınarda ShOB salyq salý máselelerine erekshe nazar aýdaryldy.
Jańa Salyq kodeksine sáıkes deklaratsııa negizinde jeńildetilgen arnaıy salyq rejimi (ASR) engiziledi. ASR tabysy 600 myń AEK (shamamen 2,4 mlrd teńge) deıingi ShOB sýbektilerine arnalyp, ákimshilik júktemeni tómendetýge baǵyttalǵan: esep tapsyrý jeńildep, atalǵan rejimge JK retinde mindetti tirkeýsiz aýysýǵa múmkindik beriledi.
Budan basqa QQS boıynsha mindetti tirkeý shegi — 10 000 AEK (shamamen 40 mln teńge) deıin azaıtyldy, bul tóleýshilerdiń sheńberin keńeıtedi. Sondaı-aq reforma eseptilik kólemin 30% jáne salyqtardy 20% deıin azaıtýdy kózdeıdi.
— Jańa zańda kásipkerlerden bereshekti óndirip alýdyń neǵurlym ıkemdi jáne jumsaq tártibi qarastyrylyp otyr. Eger de qaryz mólsheri az bolsa, kompanııalardyń shottary avtomatty túrde buǵattalmaıdy. Bul bızneske operatsııalardy toqtatpaı qyzmetin jalǵastyrýǵa múmkindik beredi. Qatań sharalardyń ornyna aldyn ala eskertýler men habarlamalar jiberý tásili qoldanylady. Kemshilikter tek júıeli túrde baıqalǵan jaǵdaıda ǵana kezeń-kezeńimen óndirip alý tetigi engiziledi. Bul amal shaǵyn jáne orta bızneske qysymdy tómendetip, kásiporyndarǵa ornyqty jumysty isteýge jol ashady, — delingen komıtet habarlamasynda.
Salyq reformasy júıeni jańartýmen birge onyń ádildigin arttyryp, bızneske damýǵa múmkindik beredi.
Osydan buryn SQO kásipkerleri mektep ashanasyna arnalǵan jańa standarttyń kemshilikterin ataǵan edi.