233 mln dollar: «Dıavol nosıt Prada 2» fılmi álemdik prokatta birinshi orynǵa shyqty
ASTANA. KAZINFORM — «Dıavol nosıt Prada 2» fılmi kınoteatrlarda úlken jetistikke jetip jatyr. Kıno alǵashqy demalys kúnderi AQSh pen Kanadada 77 mıllıon dollar, al halyqaralyq naryqta 156,6 mıllıon dollar jınap, álemdik prokatta birinshi orynǵa shyqty, dep habarlaıdy Associated Press.
Fılm kórermenderiniń basym bóligi áıelder — 76% paıyz. Olardyń 74%-y kartınany dostaryna mindetti túrde usynatynyn aıtqan.
Kınotýyndynyń bıýdjeti 100 mln dollar — bul 2006 jylǵy alǵashqy bólimnen úsh ese kóp. Birinshi bólim álemdik prokatta 326 mln dollardan astam tabys jınap, mádenı qubylysqa aınalǵan bolatyn.
Al Maıkl Djeksonnyń «Maıkl» atty ómirbaıandyq fılmi ekinshi demalysta 54 mıllıon dollar tabys taýyp, ekinshi oryndy ıelendi. Onyń álemdik kassadaǵy jalpy tabysy qazir 423,9 mıllıon dollarǵa jetti.
Osy demalys kúnderi Gollıvýdtyń jazǵy kıno maýsymy bastaldy. Comscore analıtıkalyq kompanııasynyń málimeti boıynsha jyl basynan beri AQSh-tyń jalpy kassalyq kirisi ótken jylǵy kórsetkishterden 14 paıyz joǵary. Bul shamamen 2,8 mıllıard dollar.
Qazaqstan men álem kınopremeralaryna aptalyq sholýdy myna siltemeden oqı alasyz.
