Jańa orfografııalyq sózdik ázirlenedi: Erlan Qarın «qyrkúıek» pen «qyrgúıek» daýy jaıly
ASTANA. KAZINFORM — Vıtse-prezıdent Erlan Qarın jańa Orfografııalyq sózdikti ulttyq joba retinde qaraýdy usyndy. Bul týraly ol óziniń áleýmettik jelidegi paraqshasynda jazdy.
— «Qyrkúıek» pen «qyrgúıekke» qatysty pikirtalas bizge de jetti. Shyn máninde, bul — til mamandary men ádebı ortanyń ǵana máselesi emes. Qazaq tili — memlekettik til bolǵandyqtan, árbir sózdiń aıtylýy men jazylýy memlekettik apparattyń kúndelikti jumysyna da tikeleı qatysty. Óıtkeni, qazir qazaq tili keńse tiline aınaldy. Sondyqtan mundaı máseleniń bir ushy bizge de tıetini ras, — dep jazdy Vıtse-prezıdent.
Ol qazaq tiliniń jańa Orfografııalyq sózdigin ázirleý qajet ekenin aıta ketti.
— Árıne, memleket qaı sózdi qalaı jazý kerek ekenine aralasa almaıdy, aralaspaıdy da. Bul — sala mamandary men ǵalymdardyń jumysy. Bizdiń mindetimiz — osy isti tıimdi úılestirý. Sol sebepti elimizde til saıasatyn júrgizip otyrǵan mekemelerdiń basshylary men belgili ǵalymdardy jınap, atalǵan taqyryp jóninde pikir almastyq.
Talqylaý barysynda qazaq tiliniń jańa Orfografııalyq sózdigin ázirleý qajet degen sheshimge keldik. Aldymen belgili ǵalymdardan arnaıy jumys toby qurylyp, jańa sózdik daıyndalady. Usynylǵan eńbek Mekemearalyq komıssııada qaralyp, bekitiledi, — dedi Erlan Qarın.
Erlan Qarın orfografııalyq sózdik sońǵy ret 2013 jyly shyqqanyn tilge tıek etti.
— Orfografııalyq sózdik sońǵy ret 2013 jyly shyqqan. Sodan beri qoldanysqa qanshama jańa sózder qosyldy. Qazirgi pikirtalastardyń bir ushqyny da sonda jatyr. Bul iste asyǵystyq tanytýǵa bolmaıdy ári sozyp júrýge de ýaqyt joq.
Qazaqstan tarıhynyń kóptomdyq akademııalyq jınaǵyn ázirlegendeı, jańa Orfografııalyq sózdikke de ulttyq joba retinde qaraýǵa tıispiz, — dedi ol.
Aıta ketelik «qyrgúıek», «kógónis», «shegara»: ǵalym ne sebepti «k» árpi ózgertilip jazylatynyn túsindirgen edi.
