Jańa kıno aptalyǵy: kórermenderdi qandaı premeralar kútedi
ASTANA. KAZINFORM — Jańa kıno aptalyǵynyń bastalýymen birge otandyq jáne sheteldik prokatta birqatar qyzyqty premera usynylyp jatyr. Kazinform nazar aýdarýǵa turarlyq fılmderdi saralap shyqty.
«Balerına»
Amerıkalyq boevık-trıller fılmi, «Djon Ýık» franshızasynyń spın-ofy. Rejısseri — Len Ýaızman jáne basty róldi Ana de Armas somdaıdy. Oqıǵalar «Djon Ýıktiń» úshinshi jáne tórtinshi bólimderiniń arasynda ótedi. Basty keıipker Eva Makarro bala kezinde ákesiniń óltirilgenine kýá bolǵan. Kek almaq bolǵan ol «Rýska Roma» qylmystyq uıymyna qosylyp, onda dırektordyń (Anjelıka Hıýston) jetekshiligimen balet pen kisi óltirý ónerin biriktiretin jattyǵýlardan ótip, elıtalyq óltirýshige aınalady.
«Altyn Adam»
Qazaqstandyq anımatsııalyq fılm ejelgi saqtardyń kıeli tarıhyn, turmys-tirshiligin, mádenıetin, áskerı sheberligin baıandaıdy. Bas keıipker — Ańqyl esimdi jas jaýynger Ómir otyn izdep Han Táńiriniń shyńyna attanady. Osy jolda ol shynaıy dostar taýyp, qaýip-qaterdi jeńip, saq eline tóngen zulymdyqty jeńedi. Ańqyldyń oqıǵasy — jas kórermenderge batyldyqtyń, erliktiń, qaısarlyqtyń úlgisi.
«Meniń anam — sıqyrshy»
Analyq mahabbat pen ǵajaıyptarǵa degen senim týraly áserli jáne shabyttandyratyn oqıǵa. Alty balanyń anasy balasynyń eshqashan júrmeıtinin biledi. Alaıda ol qaıǵyǵa berilmeı, onyń ómirin qýanysh pen úmitke toly sıqyrly shytyrman oqıǵaǵa aınaldyrady.
«Nechja Aıdaharlar patshasyn jeńedi»
Aıdaharlar patshasy men onyń áskerimen soǵysyp jatqan jyn bala Nechja men onyń dosy týraly anımatsııalyq fılm. Alaıda olar naızaǵaı soqqannan keıin rýhqa aınalady. Olardy fızıkalyq álemge tek Qasıetti Lotos qaıtara alady.
«Bul. Jańa taraý»?
Qorqynyshty fılm. Psıhoterapevt Sıntııa Ýınstonnyń sanadan tys tereńdikke ený erekshe qabileti bar. Bir kúni odan qorqyp ketken 14 jasar Raılı kómek suraıdy. Sıntııa qyzǵa bir zulym bolmystyń jabysyp alǵanyn birden baıqaıdy. Ol aralaspaýdy sheshedi, biraq onyń qyzy Djordan, kerisinshe, kómekteskisi keledi. Raılıdiń úıine kirgennen keıin Djordan jertólede azaptalǵan, baılanǵan áıeldi tabady.
«Birtúrli dybystar»
Baıqaýǵa áńgime jazýǵa bel býǵan jas jazýshy týraly ońtústikkoreıalyq trıller. Kórshi páterden shyqqan oǵash dybystar ol úshin shabytqa aınalady. Boıjetken turǵyndarǵa tyńshylyq jasaı bastaıdy, kóp uzamaı onyń baqylaýy alańdatarlyq jáne kútpegen jańalyqtarǵa ákeledi.
«Dýa. Іshtegi jyn»
Ákesiniń jumbaq óliminen keıin Karolına anasy jáne muǵalimderimen janjaldasa bastaıdy. Ol óziniń agressııasy men oǵash áreketterinen qorqady. Denesinen jumbaq tańbany baıqaǵan ol ishine ejelgi mysyrlyq jyn qonystanǵan dep kúdiktenedi. Ózin baqylaýǵa alý jáne ákesiniń ólimi týraly shyndyqty bilý úshin Karolına qaýipti rásimnen ótýi kerek.
«Ganzel men Gretel: «Uıqydaǵy arý» mıssııasy»
Sýper agent Gretel jáne onyń aılaker aǵasy Ganzel týraly reseılik anımatsııalyq sıkvel. Olar Hanshaıymdy sıqyrly uıqyǵa túsirgen kim jáne nege ekenin anyqtaýy kerek. Keıipkerler jańa odaqtasy — asyl hanzada Ragnarmen birge sıqyrly álem arqyly qyzyqty shytyrman oqıǵaǵa attanady.
Buǵan deıin Almatyda 100-ge jýyq kınojobanyń ashyq qorǵaýy ótetini belgili boldy.