Jambylda tarıfter tómendetildi

TARAZ. QazAqparat - Jambyl oblysynda tarıfterdi tómendetý jóninde berilgen tapsyrmalar boıynsha birqatar jumystar júrgizilýde. Onyń ishinde taýarlyq gaz tarıfi boıynsha 2019 jyldyń 1 qańtarynan taýarly gazdyń shekti baǵasy Jambyl oblysyna 11,4%-ǵa nemese 21,1 teńgeden 18,7 teńgege tómendetildi, dep habarlaıdy QazAqparat.

Sonymen qatar, taýarly gazdy tasymaldaý qyzmeti de 25%-ǵa, ıaǵnı 1,0 m3 úshin 8,5 myń teńgeden 6,4 myń teńgege tómendetilgen. Nátıjesinde, turǵyndar úshin taýarly gazdyń bólshek satylymdaǵy baǵasy 1,0 m3 úshin 6,3%-ǵa nemese 27,2 teńgeden 25,5 teńgege arzandaǵan.

Bul týraly oblys ákiminiń birinshi orynbasary Bekbolat Orynbekov, QR Ulttyq ekonomıka mınıstrligi Tabıǵı monopolııalardy retteý jáne básekelestikti jáne tutynýshylardyń quqyqtaryn qorǵaý komıtetiniń Jambyl oblysy boıynsha departamentiniń basshysy Erbolat Dúısembıev, oblys ákimdiginiń energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarovtyń qatysýymen ótken baspasóz máslıhatynda aıtyldy.

Spıkerlerdiń aıtýynsha, 2019 jyldyń 1 qańtarynan bastap, «Jambyl GRES» AQ-men óndiretin elektr energııasynyń tarıfi 14%-ǵa nemese 9,5 teńgeden 8,1 teńgege deıin jáne «Tarazenergoortalyq» (TETs-4) 19%-ǵa nemese 11 teńgeden 8,7 teńgege túsken.

«Elektr energııasyn tasymaldaıtyn «JambylElektrJúıesi» mekemesiniń tarıfin 1-qańtardan bastap 1,07%-ǵa tómendetý boıynsha kelip túsken usynysy qaralýda. Nátıjesinde, qoldanystaǵy tarıf 5,62 teńgeden boljammen 5,56 teńgege tómendeıdi.

Elektr energııasyn jabdyqtaıtyn «JambylJaryqSaýda» mekemesiniń tarıfi 3,9%-ǵa deıin tómendetý qaralýda. Nátıjesinde turǵyndarǵa arnalǵan qoldanystaǵy tarıf 15 teńgeden boljammen 14 teńgege túsedi. Sáıkesinshe, «Tarazenergoortalyq» AQ-nyń jylý qýatynyń tarıfi turǵyndar úshin 11,4%-ǵa kemitildi», - dedi Bekbolat Serikbekuly.

Atap aıtar bolsaq, jylý qýaty esepteý quraldary bar tutynýshylarǵa 1 Gkal úshin 1694 teńgeden 1502 teńgege, esepteý aspaptary joqtarǵa 3688 teńgeden 3267 teńgege tómendetilgen. Bul jumystar shaǵyn Qarataý, Shý qalalarynda da atqarylýda.

Al aýyz sýmen qamtý salasynda aǵymdaǵy jyldyń 1 qazanynan bastap, turǵyndar úshin 1 m3 sýyq sý baǵasy 21,9%-ǵa, káriz qyzmeti 0,4%-ǵa arzandaǵan.

«Páter ıeleriniń koperatıvteri, turmystyq qatty qaldyqtar jáne lıft qyzmetteri tarıfi boıynsha turǵyn úı koperatıvteri qyzmetiniń tarıfi 1 qańtardan bastap 20%-ǵa nemese 15 teńgeden 12 teńgege tómendetildi.

Turmystyq qatty qaldyqtardy shyǵarý tarıfi - 5%-ǵa, ıaǵnı bir adamǵa 100 teńgeden 94,5 teńgege kemitildi.

Lıft qyzmeti boıynsha tarıf 7,1%-ǵa tómendetiledi, 1 páter úshin 770 teńgeden 715 teńgege tústi. Kómir boıynsha búginge oblys turǵyndaryna qajetti 333 myń tonna kómirdiń daıyndalǵany 100%, onyń ishinde satyp alynǵany 304,7 myń tonnany quraıdy, qalǵan 28,3 myń tonnasy kómir satý oryndarynda. Úkimet otyrysynda bergen tapsyrmaǵa sáıkes, shuǵyl túrde oblysta kómir satýmen aınalysatyn 8 kásipker iriktelip, kómir baǵasyn tómendetý baǵytynda kásipkerlermen úsh aqty Memorandým jasalyndy»,-dedi Nurlan Januzaquly.

Basqarma basshysynyń aıtýynsha, búgingi tańda atalǵan oryndarda «Shubarkól» kómirin bosatý baǵasy 12 300 teńge, al «Qarajyra» kómiriniń tómen sapadaǵy kómiri 12 000 teńge, baıytylǵan sapaly kómiri 15 500 teńgeden satylýda.