Jambylda ınternet alaıaqtyqtyń 34 deregi anyqtaldy

TARAZ. QazAqparat – Jambyldyq polıtseıler «Anti-fraud» respýblıkalyq is-sharasyn qorytyndylady, dep habarlaıdy QazAqparat tilshisi.

Shara qorytyndysy boıynsha Jambyl oblysy polıtsııa departamentiniń qyzmetkerleri ınternet alaıaqtyqtyń 34 deregin anyqtady.

Onyń ishinde 26 deregin Taraz qalasynyń 25 jastaǵy turǵyny jasaǵan.

Ol Instagram áleýmettik jelisinde kıim satý syltaýymen azamattardyń senimine kirip, olardy aldap, aqshasy n ıemdengen.

«Sondaı-aq, Taraz qalasynyń 38 jastaǵy turǵynynyń eki alaıaqtyq áreketi tirkeldi. Ol qyzdarmen tanysyp, biraz ýaqyttan keıin olarǵa aqsha aýdarý úshin tólqujat pen bank kartasy týraly málimetterdi suraǵan. Al shyn máninde olardyń atynan shaǵyn nesıe uıymynan nesıe rásimdegen. Al Qapshaǵaı qalasynyń 1998 jyly týǵan turǵyny alaıaqtyqtyń úsh deregin jasaǵan. Kúzgi palto satý syltaýymen ol satyp alýshylardyń aqshasyn aldap alyp otyrǵan» delingen oblystyq PD baspasóz qyzmetiniń habarlamasynda.

Alaıaqtyq áreket jasaǵan barlyq azamattar ustaldy.

Barlyq derekterge qatysty Jambyl oblysynyń polıtsııa departamenti krımınaldyq polıtsııa basqarmasynyń qyzmetkerleri sotqa deıingi tergeý amaldaryn júrgizýde.