Jambylda 48 bala men eresek mektep ashanasyndaǵy tamaqtan ýlandy

Jambyl oblysy Baızaq aýdanynda balalar men eresekter jappaı ýlandy, dep habarlaıdy Kazinform. 

Oblystyq densaýlyq saqtaý basqarmasynyń baspasóz qyzmetinen habarlaǵandaı, Baızaq aýdanynyń ortalyq aýdandyq aýrýhanasyna 48 adam kelip túsken.

Olar mektep ashanasynda túski as ishkennen keıin ýlanǵan.

Onyń 35-i aýrýhanaǵa jatqyzyldy. Ekeýi eresek, qalǵany — balalar.

— Negizinen 7-10 jasar balalar kelip tústi. Bári — Baızaqtaǵy N. Kıikbaev atyndaǵy orta mekteptiń oqýshylary. Zardap shekkenderge «jiti tamaq toksıkoınfektsııasy» dıagnozy qoıyldy, — dep túsindirdi vedomstvodan.

Dárigerler aýrýhanaǵa jatqyzylǵandardyń jaǵdaıyn ortasha aýyr jáne birqalypty dep baǵalap otyr.

Infektsıonıst, pedıatr, toksıkolog, reanımatolog-anestezıolog mamandar búkil dıagnostıkalyq jáne emdeý sharalaryn jasap jatyr.

— Patsıentterge medıtsınalyq kómek kórsetý úshin QR bas ınfektsıonısimen konsýltatsııa júrgiziledi. Jaǵdaı turaqty, bári oblystyń densaýlyq saqtaý basqarmasynyń baqylaýynda, — dep naqtylady basqarmanyń baspasóz qyzmeti.