Jambyl oblysynda medıtsınalyq uıymdar 32,3 mlrd teńgeni tıimsiz jumsaǵan

TARAZ. KAZINFORM – Kemshilikterdiń jartysyna jýyǵy shyǵystardy tıimsiz josparlaýǵa qatysty bolsa, qalǵany — qarjylyq zańbuzýshylyqtar, dep habarlaıdy Kazinform agenttiginiń tilshisi.

Revızııalyq komıssııanyń málimeti súıensek, óńirde 58,9 mlrd teńgege jumsalǵan shyǵyndar tekserilgen. Sonyń jartysynan astamy aýdıtorlar tarapynan suraq týdyrǵan.

Qarjylyq zańbuzýshylyqtar kólemi 15,6 mlrd teńgeni quraǵan, onyń ishinde 15,1 mlrd teńge qalpyna keltirilýi tıis. Taǵy 13,4 mlrd teńge tıimsiz josparlanǵan, al 1,6 mlrd teńge tıimsiz paıdalanylǵan dep tanyldy.

Sonymen qatar 194 rásimdik buzýshylyq pen 13 júıeli kemshilik anyqtaldy. Olardy joıý óńirdegi medıtsınalyq uıymdarǵa tapsyryldy.

– Medıtsınalyq tehnıkany satyp alýdy josparlaý kezinde oblystyq densaýlyq saqtaý basqarmasy 7,1 mlrd teńgeni tıimsiz bólgen. Jambyl aýdandyq ortalyq aýrýhanasynda kredıtorlyq bereshek 387,6 mln teńgege jetken, al 17,1 mln teńge kólemindegi yntalandyrý tólemderi negizsiz eseptelgen. Moıynqum aýdandyq ortalyq aýrýhanasynda bas dáriger oftalmologtyń mindetin tıisti sertıfıkatsyz qatar atqarǵan. Talas aýdandyq kópbeıindi ortalyq aýrýhanasynda bereshek 808,8 mln teńgeni quraǵan, sonymen qatar 1,2 mln teńge kóleminde qolma-qol qarajattyń jetispeýshiligi anyqtalǵan, – dedi komıssııa múshesi Ilıas Tólemisov.

Tekserý qorytyndysy boıynsha 121 materıal ishki memlekettik aýdıt departamentine joldansa, taǵy 12 is Medıtsınalyq jáne farmatsevtıkalyq baqylaý komıtetiniń departamentine berilgen.

Buǵan deıin Tarazda tek bir ǵana emhana óz qýattylyǵy sheginde jumys istep turǵanyn jazǵanbyz.

Aıta ketsek, Jambyl oblysynda dárihana jelisi arqyly psıhotroptyq zat taratqan top ustaldy.