Jamby atý: Batyr Beksaýyt kúmispen kúpteldi
ASTANA. KAZINFORM – Búgin – jamby atý sportynyń sońǵy jarys kúni. Dúbirli dodanyń alǵashqy kúninen bastap bul sport túrinen júldeler úlestirilip jatyr. Sebebi, bul sporttyń baǵyty kóp. Jankúıerler sportshylardyń túri bylaı tursyn, aty-jónin de jattap úlgerdi.
Búgin otandasymyz Batyr Beksaýyt jamby stılinen kúmis júlde aldy. Buǵan deıin ol Azııa stılinen altyn medal ıelengen edi.
Túrkistan oblysynan kelgen sportshy agenttik tilshisiniń saýaldaryna jaýap berip, kóńil-kúıimen bólisti.
«Jamby atýmen 2018 jyldan beri aınalysyp kelemin. Bul dúbirli dodadan altyn jáne kúmis buıyrdy. Jaman nátıje emes sııaqty. Baǵasyn halyq berer. Bastysy – ulttyq sporttyń nasıhattalýy. Jarysqa jankúıerler zor qyzyǵýshylyq tanytqanyn ańǵardym. Ulttyq sportty qoldaý sharalary jalǵasyn tapsa, salaýatty urpaq tárbıeleýde utarymyz mol bolmaq», - dedi ol.
Aıta keteıik, byltyr da Batyr Beksaýyt úshin nátıjeli jyl bolǵan edi. Ol Majarstanda ótken Álem kýboginde ekinshi oryndy, Mońǵolııada ótken álem chempıonatynda birinshi oryndy ıelendi.
«Elimizde jamby atý sporty aldyńǵy jyldarmen salystyrǵanda júıeli damyp kele jatyr. Basqa aımaqtardy aıtpaǵanda, Túrkistan oblysyndaǵy bizdiń aýyl túgel jamby atýmen aınalysady. Tóle bı aýdanyna qarasty Maıbulaq aýylynda jamby atpaıtyn adam neken-saıaq», - dedi Beksaýyt Batyr.
Esterińizge salsaq, jamby atý jarysyna 27 memleketten 78 sportshy júldege talasty.
