Zelenskıı Tramppen sóıleskenin aıtty

ASTANA. KAZINFORM — Ýkraına prezıdenti Vladımır Zelenskıı beısenbi keshkisin AQSh prezıdenti Donald Tramppen sóıleskenin habarlady. Bul jóninde BBC jazdy.

– Prezıdent Tramppen jaqsy áńgime ótkizdik. Halyqtarymyzdy Eýropadaǵy Jeńis kúnimen — natsızmge qarsy jeńispen quttyqtadyq. Joǵarǵy Rada ekonomıkalyq áriptestik týraly kelisimdi ratıfıkatsııalaǵanyn da atap óttik. Bul – shynymen tarıhı qujat, ol yntymaqtastyq úshin kóptegen jańa múmkindikterge jol ashady, – dep jazdy Zelenskıı Telegram paraqshasynda.

Ýkraına basshysynyń aıtýynsha, AQSh prezıdenti maıdandaǵy jaǵdaıǵa qyzyǵýshylyq tanytqan.

– Tramp soǵys alańyndaǵy jaǵdaı týraly surady, men ony qysqasha aqparattandyrdym. Sonymen qatar, Ýkraına bitimge kelýge daıyn ekenin jetkizdim — biz tipti búginnen bastap 30 kúndik atysty toqtatýǵa ázirmiz. Endi Reseıden osy usynysty qoldaýdy kútemiz. Sondaı-aq Ýkraına kez kelgen formatta kelissózderge daıyn ekenin rastadym. Biraq bul úshin Reseı soǵysty aıaqtaýǵa nıetti ekenin dáleldep, atysty tolyq ári sózsiz toqtatýdan bastaýy tıis, – dedi Zelenskıı.

Aıta keteıik, buǵan deıin Donald Tramp Ýkraına men Reseıge 30 kúnge atysty toqtatýdy usynǵan bolatyn.