Zańger kóp, sýdıa jetispeıdi – Sáken Abdolla

ASTANA. KAZINFORM — Elimiz boıynsha 300-den astam sýdıa jetispeıdi. Bul týraly Jibek Joly telearnasynyń «Ýáde» baǵdarlamasyna suhbat bergen Joǵarǵy sot sýdıasy Sáken Abdolla aıtty.

«Biz tek qana zańdy basshylyqqa almaımyz, sot tájirıbesin qaraımyz. Ár sýdıa ishki dúnıesine, ar-ojdanyna, namysyna, adamgershiligine, kerek deseńiz ımandylyǵyna baılanysty isti sezinedi jáne soǵan oraı sheshim qabyldaýǵa tyrysady. Oǵan zań aıasynda tolyq múmkindik bar dep oılaımyn. Yqpalǵa tústi, anaý-mynaý dep aıtyp jatady. Menińshe, bul adamı qasıetine, óziniń minez-qulqyna baılanysty dúnıelerden týyndaıtyn jaıt. Al zań aıasynda jáne ishki dúnıeńmen, bolmysyńmen sheshim qabyldasań da, árıne, eki tarap úshin de durys sheshim qabyldadym deý qıyn. Biri bolmasa, ekinshisi ony quptamaıdy. Zań aıasynda ári ádilettikpen sheshim qabyldasań, ishki dúnıeń aldaı almaıdy, aldamaıdy da», — dedi sýdıa.

Osy rette ol óz tájirıbesinde mundaı jaıttyń jıi bolyp, ádil sheshimge taraptardyń rızashylyq bildirgenin aıtady. 

«Sol sátte búkil deneńnen rýhanı dúnıe ótkendeı bolyp, nár alasyń. Ony sózben jetkizý múmkin emes. 38 jyl memlekettik qyzmet jasasam, sonyń 23 jylynda sýdıa qyzmetin atqardym. Qansha is qaraǵanymdy eseptegen emespin. Bizde is, ásirese, Almaty, Astana qalalarynda óte kóp. Amalsyz, qaraýǵa tyrysady. Senbi, jeksenbi jumysqa shyǵady. Alda turǵan kúrdeli máseleniń biri osy. Sýdıalar jetispeıdi. Bizde 300-den asa bos oryn bar. Al zańgerler óte kóp», — dedi Sáken Abdolla.