Vıtse-prezıdent Memleket basshysynyń bastamalaryn júzege asyrý jóninde keńes ótkizdi
ASTANA. KAZINFORM – Aqordada Vıtse-Prezıdent Erlan Qarınniń tóraǵalyǵymen ishki saıasattyń negizgi baǵyttary jóninde jumys keńesi ótti. Bul týraly Aqordanyń baspasóz qyzmeti habarlady.
Aqordada Vıtse-Prezıdent Erlan Qarınniń tóraǵalyǵymen ishki saıasattyń negizgi baǵyttary jóninde jumys keńesi ótti. Jıynǵa Prezıdent Ákimshiligi qurylymdyq bólimsheleriniń, áleýmettik-mádenı jáne aqparattyq bloktarǵa jaýapty ortalyq memlekettik organdardyń basshylary qatysty.
Keńeste Prezıdent Qasym-Jomart Toqaevtyń qoǵamdyq birlikti nyǵaıtýǵa, konstıtýtsııalyq qundylyqtar men qaǵıdattardy nasıhattaýǵa baǵyttalǵan bastamalarynyń iske asyrylý barysy qaraldy.
«Zań jáne tártip» qaǵıdatyn ilgeriletýge, «Taza Qazaqstan» jobasyn júzege asyrýǵa, «Adal Azamat» qundylyqtaryn ornyqtyrýǵa qatysty naqty sharalar pysyqtaldy.
Erlan Qarın Memleket basshysynyń Jarlyǵymen qabyldanǵan ishki saıasattyń negizgi qaǵıdattary, qundylyqtary men baǵyttary bekitilgen tujyrymdamalyq qujat memlekettik organdardyń ishki saıasat salasyndaǵy jumysynyń mazmundyq negizi ekenin atap ótti.
Atalǵan qujatta memlekettik apparat jumysynyń basym baǵyttary aıqyndalǵan: ashyq ári turaqty qoǵamdyq dıalogty jolǵa qoıý, etnosaralyq jáne konfessııaaralyq kelisimdi odan ári nyǵaıtý, memlekettiń jastar, aqparat jáne mádenı-gýmanıtarlyq saladaǵy saıasatyn tıimdi júrgizý.
Jıyn qorytyndysy boıynsha Erlan Qarın Memleket basshysynyń ishki saıasat salasyndaǵy bastamalaryn júzege asyrýǵa arnalǵan keńes turaqty túrde ótkiziletinin aıtyp, jaýapty memlekettik organdarǵa naqty tapsyrmalar berdi.
Aıta ketelik Prezıdent Vıtse-prezıdenttiń ókilettikteri týraly jarlyqqa qol qoıǵan edi.
