Vıtse-Prezıdent Qazaqstan Halyq Keńesiniń alǵashqy sessııasynda Memleket basshysy aıtqan bastamalardy iske asyrý máseleleri boıynsha keńes ótkizdi
ASTANA. KAZINFORM — Vıtse-Prezıdent etnosaralyq kelisimdi nyǵaıtý máseleleri jóninde respýblıkalyq keńes ótkizdi. Bul týraly Aqordanyń baspasóz qyzmeti habarlady.
Aqordada Vıtse-Prezıdent Erlan Qarınniń tóraǵalyǵymen etnosaralyq kelisimdi odan ári nyǵaıtý, sondaı-aq Memleket basshysy Qasym-Jomart Toqaevtyń Qazaqstan Halyq Keńesiniń alǵashqy sessııasynda aıtqan bastamalary men tapsyrmalaryn iske asyrý máselelerine arnalǵan respýblıkalyq jumys keńesi ótti.
Jıynǵa Bas prokýratýranyń, Prezıdent Ákimshiligi qurylymdyq bólimsheleriniń, Qazaqstan Halyq Keńesi Hatshylyǵynyń, Syrtqy ister, Іshki ister, Ádilet, Mádenıet jáne aqparat, Oqý-aǵartý, Ǵylym jáne joǵary bilim mınıstrlikteriniń basshylary qatysty.
Eń aldymen, jıynda Memleket basshysynyń Qazaqstan Halyq Keńesiniń birinshi sessııasynyń ashylýynda júktegen mindetterin oryndaý máseleleri qaraldy. Erlan Qarın qoǵamda Prezıdenttiń negizgi ustanymdaryn ilgeriletý boıynsha aqparattyq-túsindirý jumystaryn jalǵastyrýdy tapsyrdy, sondaı-aq Memleket basshysynyń tapsyrmalaryn iske asyrý barysyn aıryqsha baqylaýǵa alý qajet ekenine nazar aýdardy.
— Konstıtýtsııada aıqyndalǵan qundylyqtar Prezıdent Qasym-Jomart Toqaevtyń saıası baǵdarynyń maǵynalyq ózegin quraıdy jáne qoǵamdyq tutastyqty nyǵaıtýdyń berik negizin qalyptastyrady. Osy turǵyda etnosaralyq jáne konfessııaaralyq kelisimniń konstıtýtsııalyq qundylyq retinde mańyzy aıryqsha. Bular — memlekettiń turaqty damýynyń negizi. Sondyqtan atalǵan qundylyqtardy qoǵamdyq sanada ornyqtyryp, keńinen nasıhattaý maqsatynda júıeli ári turaqty jumys júrgizilýi qajet, — dedi Erlan Qarın.
Sondaı-aq Vıtse-Prezıdent Qazaqstan Halyq Keńesiniń Hatshylyǵy azamattardyń etnosaralyq kelisim, qoǵamdyq dıalog jáne óńirlerdi damytý máselelerine qatysty suranystaryn jınaqtap, olardy toptastyratyn ornyqty qoǵamdyq alań qalyptastyrý baǵytynda júıeli jumys bastalǵanyn atap ótti.
— Prezıdent Qazaqstan halqy Assambleıasy men Ulttyq quryltaıdyń sabaqtastyǵyn, dástúri men ozyq tájirıbesin saqtaý týraly naqty mindet júktedi. Qazaqstan Halyq Keńesiniń Hatshylyǵy bul baǵyttaǵy uıymdastyrýshylyq jumysty jetildirýde negizgi ról atqarady, — dedi Erlan Qarın.
Budan keıin jıynda etnosaralyq jáne konfessııaaralyq kelisimdi konstıtýtsııalyq qundylyq retinde ornyqtyrý máselesi qaraldy.
Erlan Qarın jańa Konstıtýtsııa qabyldanyp, negizgi bılik ınstıtýttarynyń qalyptasýyna baılanysty zamanaýı ári serpindi memlekettik-saıası modelge kóshý úderisi júzege asqanyn atap ótti. Onyń aıtýynsha, ishki saıasattaǵy mańyzdy baǵyttardyń biri — qoǵamda Konstıtýtsııada bekitilgen memlekettik qaǵıdattar men jalpyulttyq qundylyqtardy ornyqtyrý. Onyń ishinde Zań jáne Tártip ústemdigin qamtamasyz etý, ult birligin nyǵaıtý aıryqsha mańyzǵa ıe.
— Memleket basshysy atap ótkendeı, elimizde tiline, ultyna, dinı kózqarasy men nanym-senimine qaraı nemese ózge de sebepterge baılanysty kemsitýge bolmaıdy. Sondyqtan qoǵamnyń birligine nuqsan keltiretin kez kelgen áreketke memleket «Zań jáne Tártip» qaǵıdaty aıasynda qatań tosqaýyl qoıady. Qoǵam da jaýapkershilik pen parasattylyq tanytýy kerek. Til, etnosaralyq qatynastar, din sııaqty sezimtal máseleler tóńireginde shamadan tys emotsııaǵa berilip, pikir talastyrý qoǵam birliginiń ıdeologııalyq negizderine belgili bir deńgeıde zardabyn tıgizýi múmkin ekenin túsingeni abzal, — dedi Erlan Qarın.
Sonymen qatar keńes barysynda «Zań jáne Tártip» qaǵıdatyn, «Taza Qazaqstan» jobasyn, «Adal azamat» tárbıe baǵdarlamasyn júıeli ári naqty iske asyrý máselelerine nazar aýdaryldy. Erlan Qarınniń aıtýynsha, Prezıdenttiń atalǵan bastamalarynyń mán-mańyzy bir-birimen baılanysty ári jańa qoǵamdyq etıkany qalyptastyrýǵa baǵyttalǵan ózara sabaqtas dúnıeler.
— Búginde elimizde jalpyulttyq kún tártibindegi negizgi máseleler boıynsha ornyqty qoǵamdyq konsensýs qalyptasqan. Al qoǵamda ara-tura bolyp turatyn túrli rezonansty jaǵdaılar kóbine jekelegen azamattardyń qarapaıym ádep normalaryn saqtamaýynan ári ózgelerge qurmettiń joqtyǵynan týyndaıdy. Sondyqtan qazirgi tańda jańa qoǵamdyq etıkany qalyptastyrý jáne ilgeriletý asa mańyzdy, — dedi Vıtse-Prezıdent.
Erlan Qarın bul baǵyttaǵy jumystyń tıimdiligi memlekettik organdar qyzmetin turaqty úılestirýdi jáne qoǵamdyq ınstıtýttarmen ózara júıeli is-qımyldy talap etetinin eske saldy.
Vıtse-Prezıdent keńes qorytyndysy boıynsha memlekettik organdarǵa ózara is-qımyldyń áldeqaıda tıimdi tetigin qalyptastyrý jáne etnosaralyq kelisimdi odan ári nyǵaıtý úshin jumys tásilderin jetildirýdi tapsyrdy.
