Vıtse-Prezıdent ISESKO bas dırektorymen kezdesti
ASTANA. KAZINFORM — Almatyda ál-Farabı murasyna arnalǵan halyqaralyq sımpozıým aıasynda Vıtse-Prezıdent Erlan Qarın Islam áleminiń bilim, ǵylym jáne mádenıet uıymynyń (ISESKO) bas dırektory Salım Ál-Malıkpen kezdesti. Bul týraly Aqordanyń baspasóz qyzmeti habarlady.
Erlan Qarın jańa Konstıtýtsııanyń mańyzyna toqtalyp, basty qujatta adam kapıtalyn damytý, bilim berý, ǵylym jáne ınnovatsııalardy ilgeriletý eldiń strategııalyq basymdyǵy retinde bekitilgenin atap ótti.
Vıtse-Prezıdent ál-Farabı murasyn halyqaralyq deńgeıde nasıhattaýǵa qoldaý kórsetip, Túrkistan qalasyn 2027 jylǵy Islam áleminiń mádenı astanasy dep jarııalaý jóninde sheshim qabyldaǵany úshin ISESKO bas dırektoryna Memleket basshysy Qasym-Jomart Toqaevtyń alǵysyn jetkizdi.
Osy oraıda, taraptar Túrkistan qalasynda birlesken mádenı is-sharalar ótkizýge daıyndyq máselesin, sondaı-aq ál-Farabı men Qoja Ahmet ıAsaýı murasyn ǵylymı turǵydan zerdeleýge jáne keńinen nasıhattaýǵa qatysty jobalardy talqylady.
Sonymen qatar Qazaqstannyń on jańa nomınatsııasyn ISESKO-nyń Islam álemi murasy tizimine engizý isi pysyqtaldy. Birlesken ǵylymı jáne bilim berý baǵdarlamalaryn júzege asyrý áleýetine nazar aýdaryldy.
Vıtse-Prezıdent ISESKO uıymymen Álemdik jáne dástúrli dinder lıderleri sezi aıasyndaǵy yntymaqtastyqtyń basym baǵyttaryn aıqyndady. Olardyń qatarynda Memleket basshysynyń Jahandyq beıbitshilik qozǵalysyn qurý jónindegi bastamasyn ilgeriletý, sondaı-aq Álemdik jáne dástúrli dinder lıderleri sezi Hatshylyǵynyń XXIV otyrysynda qabyldanǵan qujattardy júzege asyrý máseleleri bar.
Kezdesý barysynda Uıymnyń 2027 jyly ótetin Hatshylyqtyń XXV otyrysyna jáne 2028 jyly uıymdastyrylatyn Álemdik jáne dástúrli dinder lıderleriniń IX sezine daıyndyq jumystaryna qatysý jaıy da talqylandy.
Aıta ketelik Esik jazýy men Máshhúr Júsip jınaǵy ıÝNESKO tizilimine engen edi. Sonymen qatar qazaqtyń úsh birdeı mádenı murasy ıÝNESKO tizimine usynyldy.
