Vıtse-Prezıdent birqatar qoǵam qaıratkerine memlekettik nagradalar tapsyrdy
ASTANA. KAZINFORM — Memleket basshysynyń tapsyrmasyna sáıkes Vıtse-Prezıdent Erlan Qarın birqatar qoǵam qaıratkerine, ǵylym, bilim jáne mádenıet salalarynyń ókilderine memlekettik nagradalardy saltanatty túrde tabystady. Bul týraly Aqordanyń baspasóz qyzmeti habarlady.
Vıtse-Prezıdent bıyl elimizde tarıhı mańyzy zor ózgerister bolyp jatqanyn aıtty.
– Konstıtýtsııamyzda ulttyq biregeıligimizdi, birligimizdi, damý men ilgerileýge degen umtylysymyzdy aıqyndaıtyn qundylyqtar men qaǵıdattar bekitilgen. Memleket basshysy Qasym-Jomart Toqaev Táýelsizdik pen Egemendik qoǵamymyzdyń negizgi qundylyqtary ekenin únemi aıtyp otyrady. Sondyqtan Respýblıka kúni elimizdiń árbir azamaty úshin aıryqsha mańyzǵa ıe, – dedi Erlan Qarın.
Vıtse-Prezıdent Memleket basshysynyń jasampaz eńbek kýltin dáripteýge, eńbeksúıgishtik pen kásibılik qundylyqtaryn nasıhattaýǵa, jumysshy mamandyqtarynyń mártebesin arttyrýǵa erekshe mán berip otyrǵanyna nazar aýdardy.
Sol sebepti bıyl Prezıdent Jarlyǵymen elimizdiń damýyna erekshe úles qosqan 120-dan astam eńbek ardageri, 470-ten astam ónerkásip jáne aýyl sharýashylyǵy salalarynyń eńbekkerleri, 150-ge jýyq pedagog pen ǵalym, 120-ǵa jýyq medıtsına qyzmetkeri, 200-den astam kásipker jáne basqa da azamattar joǵary memlekettik nagradalarǵa ıe boldy.
Vıtse-Prezıdent Erlan Qarın marapat ıelerin Memleket basshysynyń atynan aldaǵy Respýblıka kúnimen quttyqtap, olardyń el ıgiligi jolyndaǵy eńbekterine tolaıym tabys, baq-bereke tiledi.
