VIP nómirlerdiń qunyn kim belgileıdi
ALMATY. KAZINFORM — Almatylyqtar jyl basynan beri 5039 VIP nómirge tapsyrys bergen. Bul týraly «Azamattarǵa arnalǵan úkimet» memlekettik korporatsııasynyń fılıalynan málim etti.
Mamandandyrylǵan halyqqa qyzmet kórsetý ortalyǵynyń basshysy Aset Turǵymbaev VIP nómirlerdiń qunyn kim belgileıtinin aıtty.
— Keıbir adamdar VIP-nómirlerdiń qunyn «Azamattarǵa arnalǵan úkimet» belgileıdi degen qate pikirde. Satýdan túsken qarjy memlekettik qazynaǵa túsedi jáne memlekettik baj mólsheri Qazaqstan Respýblıkasynyń Salyq kodeksimen retteledi, — dep atap ótti №1 mamandandyrylǵan halyqqa qyzmet kórsetý ortalyǵynyń basshysy Áset Turǵymbaev.
Sandar men áripterdiń kombınatsııasyna baılanysty VIP-nómirlerdiń baǵasy bıyl 57 AEK (210 444 teńge) boldy. Qala turǵyndary arasynda úlken suranysqa ıe nómirler: 010, 020, 030, 040, 050, 060, 070, 077, 080, 090, 707.
Al eń qymbat nómirlerge: 001, 002, 003, 004, 005, 006, 007, 008, 009, 777 jatady. Mundaı nómir úshin ár kólik ıesi 285 AEK (1052 220 teńge) tóleıdi.
«Azamattarǵa arnalǵan úkimet» memlekettik korporatsııasynyń Almaty qalasy boıynsha fılıaly osy jyly 863 324 996 802 kólik tirkelip, 116 741 júrgizýshi kýáligi berilgenin málimdedi.
— Klıent mamandandyrylǵan HQKO-ǵa júginip, qajetti VIP nómirine tapsyrys beredi. Mamandar bazada joǵary suranys nómirlerin tekseredi. Klıent sandyq jáne áriptik belgilerdi aldyn ala naqtylaý arqyly tapsyrys bere alady. Tapsyrys bergen nómirler Almatyda 5 jumys kúni ishinde daıyndalady. Sondaı-aq, kólik ıesi tańdaǵan memlekettik tirkeý nómirlik belgisin eGov portaly jáne eGov Mobile arqyly tapsyrys berýine bolady, — dedi Áset Turǵymbaev.
Aıta keteıik, budan buryn Almaty HQKO-lary bıyl 2,4 mıllıon adamǵa qyzmet kórsetkeni belgili boldy.