Bakýde «Study in Kazakhstan» halyqaralyq bilim berý kórmesi ótti
BAKÝ. KAZINFORM — Іs-shara Qazaqstan men Ázerbaıjan arasyndaǵy joǵary bilim salasyndaǵy yntymaqtastyqty keńeıtýge baǵyttaldy, dep jazdy Kazinform agenttiginiń menshikti tilshisi.
Kórme Qazaqstannyń Joǵary bilimdi damytý ulttyq ortalyǵy men İZ Community kompanııasynyń qoldaýymen uıymdastyrylyp, oǵan elimizdiń jetekshi joǵary oqý oryndary qatysty. Olar sheteldik talapkerlerge arnalǵan bilim berý baǵdarlamalaryn, oqýǵa túsý sharttaryn jáne oqý múmkindikterin tanystyrdy.
Kórmege ázerbaıjandyq jastar úlken qyzyǵýshylyq tanytty. Qonaqtar qatarynda joǵary synyp oqýshylary, stýdentter, olardyń ata-analary jáne bilim berý uıymdarynyń ókilderi boldy. Qatysýshylar oqý baǵdarlamalary, jataqhana jaǵdaıy jáne oqý bitirgennen keıingi jumysqa ornalasý múmkindikteri týraly belsendi túrde aqparat aldy.
Kórmeniń ashylýynda Qazaqstannyń Ázerbaıjandaǵy elshisi Alım Baıel eki el arasyndaǵy bilim berý salasyndaǵy yntymaqtastyqtyń turaqty damyp kele jatqanyn atap ótti. Onyń aıtýynsha, sońǵy bir jylda Qazaqstanda bilim alyp jatqan ázerbaıjandyq stýdentterdiń sany eki esege jýyq artqan. Sonymen qatar, qazaqstandyq joǵary oqý oryndaryna degen qyzyǵýshylyq ósip, elimiz aımaqtyq bilim berý ortalyǵy retindegi pozıtsııasyn nyǵaıtyp keledi.
Uıymdastyrýshylardyń pikirinshe, mundaı is-sharalar sheteldik stýdentterdi tartýmen qatar, Qazaqstan men Ázerbaıjan ýnıversıtetteri arasynda turaqty akademııalyq baılanystardy qalyptastyrýǵa múmkindik beredi.
Buǵan deıin Qazaqstan men Ázerbaıjan birlesken týroperatordy iske qosqanyn jazdyq.
