Vedomstvolyq nagradalardyń biryńǵaı standarty ázirlenedi
ASTANA.KAZINFORM — Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń otyrysy ótti. Bul týraly Aqordanyń baspasóz qyzmeti habarlady.
Memlekettik keńesshi Erlan Qarınniń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń otyrysy ótti.
Memleket basshysynyń tapsyrmasyna sáıkes, komıssııa otyrysynda vedomstvolyq nagradalardyń biryńǵaı standarty men tizimin ázirleýge qatysty máseleler qaraldy.
Sonymen qatar Premer-mınıstrdiń orynbasary – Mádenıet jáne aqparat mınıstri Aıda Balaevanyń memlekettik rámizderdi qoldaný ári nasıhattaý jónindegi jumystarynyń esebi tyńdaldy.
Memlekettik keńesshi jıyndy qorytyndylaı kele, memlekettik rámizder, marapattar jáne geraldıka salasyndaǵy jumystardyń tıimdiligin arttyrýǵa qatysty naqty tapsyrmalar berdi.
Aıta ketelik memlekettik rámizder týraly konstıtýtsııalyq erejeler jetildirilgen edi.
