Úıde esirtki tutynǵandarǵa jaýapkershilik engizilmek
Elimizdiń Іshki ister mınıstrligi qoǵamdyq orynnan tys jerde de esirtki tutynǵany úshin ákimshilik jaýapkershilik engizý máselesin qarastyryp jatyr, dep habarlaıdy Kazinform.
«Medıtsınalyq maqsattan bólek esirtki tutynýǵa shúbásiz ári tolyq tyıymdy qamtamasyz etý úshin olardy qoǵamdyq orynnan tys jerde de tutynýǵa ákimshilik jaýapkershilik engizý máselesi talqylanyp jatyr», - delingen agenttiktiń resmı saýalyna mınıstrlik bergen jaýapta.
Bul bastama maquldanǵan jaǵdaıda eskirtkini úıde, kólikte nemese kóńil kóteretin oryndarda medıtsınalyq maqsattan bólek tutynǵan kezde ákimshilik zańmen jazaǵa tartylady.
ІІM qoldanystaǵy zańnamada esirtkini qoǵamdyq orynda tutynǵany úshin qylmystyq jaýapkershilik kózdelgenin atap ótedi. Mundaı teris qylyq jasaǵandar aıyppul arqalaıdy nemese qoǵamdyq jumysqa jegiledi.
Munan bólek, qazirgi ýaqytta 2023-2025 jyldarǵa arnalǵan nashaqorlyqpen jáne esirtki bıznesimen kúres jónindegi keshendi jospardy júzege asyrý aıasynda mınıstrlik beıindi departamentti qaıta uıymdastyrý jumysyn júrgizip jatyr. Atalǵan mekemege esirtki aınalymyn baqylaý jáne osy saladaǵy vedomstvoaralyq úılestirý qyzmetterin júzege asyrý úshin jan-jaqty ókilettik berilmek.
