Úshemderi bar otbasylar qaı óńirlerde kóp tirkelgen
ASTANA. KAZINFORM — Keıingi jyldary úshemderi bar otbasylar kóbine elimizdiń qaı óńirlerinde tirkelip júr? Bul suraqqa QR Densaýlyq saqtaý mınıstrligi jaýap berdi.
— QR DSM «Salıdat Kaıyrbekova atyndaǵy ulttyq ǵylymı densaýlyq saqtaýdy damytý ortalyǵy» ShJQ RMK-niń usynǵan deregine sáıkes, sońǵy jyldary úshem ómirge kelgen otbasylar kóbinese Astana, Almaty qalalary jáne Túrkistan oblysynda tirkelgen, — delingen mınıstrliktiń Kazinform agenttigine bergen jaýabynda.
Máselen, Almaty qalasynda 2023 jyly — 8, 2024 jyly 10 otbasynda úshemder dúnıege keldi. Al Túrkistan oblysynda 2023 jyly — 8, 2024 jyly 9 otbasynda osyndaı qýanyshty jaǵdaı boldy. Astana qalasynda 2023 jyly — 7, al 2024 jyly 6 jaǵdaı tirkelgen.
Eske salsaq, jaqynda Túrkistan oblysynda úshem ómirge kelgenin jazǵan edik.