Monoqalalarǵa baratyn dárigerler qandaı áleýmettik kepildiktermen qamtamasyz etiledi
ASTANA. KAZINFORM — Premer-mınıstrdiń orynbasary — Mádenıet jáne aqparat mınıstri Aıda Balaeva Májilis depýtattarynyń saýalyna oraı monoqalalarǵa baratyn dárigerlerge qandaı áleýmettik kepildikter beriletinin aıtty.
— «Halyq densaýlyǵy jáne densaýlyq saqtaý júıesi týraly» kodekstiń 12-babyna sáıkes, oblystardyń, respýblıkalyq mańyzy bar qalalardyń jáne astananyń jergilikti ókildi organdary aýyldyq jerge jáne kentterge, aýdandyq jáne oblystyq mańyzy bar qalalarǵa jumysqa jiberilgen medıtsına jáne farmatsevtıka qyzmetkerlerin áleýmettik qoldaý sharalarynyń júıesin, sondaı-aq olarǵa bıýdjet qarajaty esebinen áleýmettik qoldaý kórsetý tártibi men mólsherin aıqyndaıdy, — dedi vıtse-premer jaýabynda.
Onyń málimetinshe, atalǵan kodekstiń 272-babyna sáıkes, aýyldyq aýyldyq jerde jáne kentterde, aýdandyq mańyzy bar qalalarda jumys isteıtin, memlekettik medıtsınalyq uıymdardyń medıtsına qyzmetkerlerine mynadaı áleýmettik qoldaý sharalary kózdeledi:
— Qazaqstan Respýblıkasynyń zańnamasyna sáıkes jergilikti atqarýshy organdardyń sheshimimen mindetti túrde turǵynjaı, onyń ishinde qyzmettik turǵynjaı berý;
— jergilikti atqarýshy organ belgilegen tártippen járdemaqylardyń mindetti túrde tólenýi;
— jergilikti atqarýshy organdardyń sheshimimen kommýnaldyq shyǵystardy óteý boıynsha áleýmettik qoldaý kórsetý jáne basqa da jeńildikter;
— ózge de sharalar.
— Qazirgi ýaqytta óńirlerdiń jergilikti ókildi organdary aýyldyq jerlerge, kentterge, aýdandyq jáne oblystyq mańyzy bar qalalarǵa, onyń ishinde monoqalalarǵa jumysqa jiberilgen medıtsına jáne farmatsevtıka qyzmetkerlerin áleýmettik qoldaý sharalarynyń júıesin (turǵyn úımen qamtamasyz etý, járdemaqy tóleý, kommýnaldyq shyǵystardy óteý jáne basqa da jeńildikter), sondaı-aq bıýdjet qarajaty esebinen kórsetiletin áleýmettik qoldaýdyń tártibi men mólsherin aıqyndaıdy. 2025 jyly respýblıka boıynsha jalpy 1 760 dáriger, onyń ishinde 546 dáriger — qalalarda, 1 009 dáriger — aýyldyq eldi mekenderde jáne 205 dáriger — monoqalalarda áleýmettik qoldaý aldy, — dedi Aıda Balaeva.
Onyń atap ótýinshe, 2025 jyly monoqalalarda 137 dárigerge 3 000 000-nan 8 500 000 teńgege deıin járdemaqy tólendi; 112 dáriger turǵyn úımen qamtamasyz etildi; 9 dáriger ózge de áleýmettik qoldaý sharalaryn (5 AEK mólsherinde kommýnaldyq tólemder, balabaqshadan oryn berý, erin nemese zaıybyn jumysqa ornalastyrý) aldy.
— Bul aýyldyq eldi mekenderdi ǵana emes, monoqalalardy da damytý men qoldaýdyń basymdyǵyn rastaıdy. Úkimet saladaǵy kadrlyq áleýetti damytý, medıtsına qyzmetkerlerin áleýmettik kepildiktermen qamtamasyz etý jáne olardy qorǵaý máselelerine erekshe kóńil bóledi, — dedi ol.
Buǵan deıin aýylǵa baratyn dárigerlerge qandaı qoldaý tetikteri qarastyrylǵanyn jazǵan edik.
